Koreya Mehnat partiyasi markaziy qo‘mitasi bo‘lim boshlig‘ining o‘rinbosari, Shimoliy Koreya yetakchisi Kim Chen Inning singlisi Kim Yo Chjonning lavozimi ko‘tarilgani aytilmoqda. Bu haqda Shimoliy Koreya rasmiy OAVlariga tayanib, Janubiy Koreyaning Yonhap agentligi xabar berdi.
Shimoliy Koreya markaziy telegraf axborot agentligidagi mamlakatning avvalgi yetakchisi Kim Chen Ir vafotining 10 yilligiga bag‘ishlangan xabarlarda Kim Yo Chjon Shimoliy Koreya Mehnat partiyasi Markaziy Qo‘mitasi Siyosiy byurosining sakkiz nafar amaldagi a’zolari qatorida tilga olingan. Shu sababli Yonhap Shimoliy Koreya yetakchisining singlisi Siyosiy byuro a’zosi yoki deputat etib tayinlanganini taxmin qilmoqda.
Bundan tashqari, xotirlash marosimidan teletranslatsiya davomida Kim Yo Chjon Siyosiy byuroning uch nafar a’zosi bilan yonma-yon turgani ko‘rsatilgan.
Kim Yo Chjon Shimoliy Koreya yetakchisining singlisi. U ko‘pincha Kim Chen Inning vorisi sifatida tilga olinadi, ayniqsa akasining sog‘lig‘i bilan bog‘liq muammolar haqida mish-mishlar paydo bo‘lganda bu mavzuda ko‘p gapirilgan.
Kim Chen In hali qirq yoshga ham kirmagan. U 2011-yilda, otasi Kim Chen Irning vafotidan so‘ng KXDR boshqaruvini qo‘lga olgandi.
Avvalroq KXDR asoschisi Kim Ir Senning ukasi vafot etgani to‘g‘risida xabar berilgandi.
Izoh (0)