Janubiy Koreya Milliy razvedka xizmati (NIS) ayrim OAVlarning KXDRda davlat to‘ntarishi sodir etilgani to‘g‘risida xabarlarini rad etdi, deb xabar beradi “Interfaks”.
Ma’lum qilinishicha, Milliy razvedka xizmati Shimoliy Koreya yetakchisining singlisi Kim Yo Chjon davlat to‘ntarishidan so‘ng Kim Chen Inni hokimiyatdan ag‘dargani ta’kidlangan xabarlarni rad etgan.
Yana bir hukumat amaldori Yonhap agentligiga ushbu ma’lumotlar haqiqatga mos kelmasligini bildirgan.
Agentlikning eslatishicha, qator OAVlar Amerikaning Globe tabloidiga tayanib, Kim Yo Chjon 6-may—5-iyun kunlari davlat to‘ntarishini amalga oshirib, Kim Chen Inni hokimiyatdan ketkazgani haqida yozgan. Xabarlarda KXDRda o‘tkazilgan yaqindagi tadbirlarda Shimoliy Koreya yetakchisiga o‘xshash inson ishtirok etgani ta’kidlangan.
OAVlar bu kabi da’volarini Kim Chen Inning tashqi ko‘rinishi o‘zgargani bilan izohlagan. Xususan, qayd etilishicha, ayni vaqtlarda KXDR yetakchisi sezilarli darajada ozgan.
Eslatib o‘tamiz, iyun oyining oxirida KXDR davlat matbuoti mamlakat rahbarining vazn yo‘qotganini rasman tan olgandi. Shuningdek, Janubiy Koreya nashrlarida qayd etilishicha, uning bo‘yi 170 santimetrni, vazni 140 kilogrammni tashkil etgan, bu 30-40 yoshli odamlar uchun me’yordan oshiq bo‘lib, qandaydir kasallik mavjudligidan dalolat berishi mumkin.
Kimning sog‘lig‘i yuzasidan ommaga kamdan kam beriladigan izohlar iyun oyining boshida xorijiy tahlilchilar KXDR yetakchisi ozib ketganini qayd etganidan keyin paydo bo‘ldi. Kim Chen Inning sog‘lig‘i haqidagi mish-mishlar 2020-yil boshida kuchaygan.
Avgust boshida Kim Chen Inning boshidagi dog‘lar uning sog‘lig‘i haqida yana bir munozaraga sabab bo‘lgandi. Sentabrda esa internetda Shimoliy Koreya rahbarining foto va videotasvirlari u Pxenyandagi “qiyin va murakkab” sohalarda ishlash uchun “ko‘ngilli ravishda” da’vogar bo‘lib chiqqan talabalar va maktab o‘quvchilari bilan uchrashuv o‘tkazganidan so‘ng paydo bo‘ldi.
Izoh (0)