Shimoliy Koreya 4-oktabr kuni ertalab Koreyalararo aloqa kanallarining barchasi tiklanishini ma’lum qildi. Bu haqda Shimoliy Koreya Markaziy telegraf agentligiga tayanib, “RIA Novosti” xabar berdi.
Ma’lum bo‘lishicha, bu tashabbus dastlab Shimoliy Koreya rahbari Kim Chen In tomonidan ilgari surilgan. Janubiy Koreya esa uni qo‘llab-quvvatlagan.
“Tegishli idoralar uning (Kim Chen Inning) niyatiga muvofiq, 4-oktabr kuni soat 09.00 dan (Toshkent vaqti bilan 5:00) boshlab barcha aloqa liniyalarini tiklashga qaror qildi”, — deyiladi Markaziy telegraf agentligi xabarida.
Rasmiy agentlik tarqatgan KXDR pozitsiyasiga ko‘ra, Janubiy Koreya hukumati “Shimol va Janub o‘rtasidagi munosabatlarni yaxshilash uchun ijobiy harakatlarni amalga oshirishi zarur”. KXDR, shuningdek, qo‘shnilarini “aloqa liniyalarini tiklash muhimligini” unutmaslikka chaqirdi.
Avvalroq Janubiy Koreya prezidenti Mun Chje In BMT Bosh assambleyasining 76-sessiyasida nutqi so‘zlar ekan ikki Koreya o‘rtasida urushi tugaganini e’lon qilishni yana bir bor taklif qilgandi. Uning fikricha, Xitoy va AQSh shartnoma tuzilishiga yordam berishi kerak. Vashington bu masalani o‘rganish ustida ish boshlaganini bildirgan.
Ammo KXDR Tashqi ishlar vazirligi Janubiy Koreya bilan urush tugaganini e’lon qilishga hali erta ekanini aytdi.
Keyinroq Koreya Mehnat partiyasi markaziy qo‘mitasi bo‘lim mudiri o‘rinbosari, Shimoliy Koreya rahbarining singlisi Kim Ye Chjon Pxenyan Seul bilan Koreyalararo urushning rasman tugagani to‘g‘risida konstruktiv muloqotga tayyor ekanini ma’lum qildi. Qayd etilishicha, u Janubiy Koreya prezidenti Mun Chje Inning Koreya urushi tugaganini e’lon qilish haqidagi taklifini “qiziqarli va yaxshi g‘oya” deb bilishini aytgan.
“Janubiy Koreya dushmanlik qilmasa, bizga nisbatan ig‘vo qo‘zg‘atmasa, qo‘sh standartlar bilan o‘jarlik ko‘rsatmasa, hammadan va hamma narsadan ayb qidirishini o‘tmishda qoldirsa, buyog‘iga har bir so‘zi va harakati haqida oldindan o‘ylasa, biz doimiy yaqin muloqotda Koreyalararo aloqalarni tiklash va rivojlantirish istiqbollarini konstruktiv muhokama qilishga tayyormiz”, — dedi Kim Yo Chjon.
Ikki Koreya urushi uch yildan ko‘proq davom etgan — 1950-yil iyun oyining oxiridan 1953-yil iyul oyining oxirigacha, lekin tinchlik shartnomasi hali rasman imzolanmagan. Unda KXDR tomonidan SSSR va Xitoy ishtirok etgan, Janubiy Koreyaga AQSh, Buyuk Britaniya, Fransiya, Gollandiya va boshqa G‘arb davlatlari yordam bergan.
Iyul oyida Janubiy Koreya prezidenti Mun Chje In va KXDR yetakchisi Kim Chen In Seul va Pxenyan o‘rtasida to‘g‘ridan to‘g‘ri aloqa liniyasini qayta tiklashga kelishib olgandi.
Izoh (0)