Kopengagenning BIG (Bjarke Ingels Group) arxitektura byurosi Budapeshtda barpo etiladigan yangi Vengriya tabiiy tarix muzeyining loyihasini taqdim etdi. Byangin bino nafaqat o‘zining eksponatlar kolleksiyasi, balki g‘ayrioddiy eksteryeri bilan ham hayratlantiradi: uning ko‘rinishi tabiat bilan uyg‘un bo‘lib, tomi bo‘ylab sayr qilish mumkin qir-adirlarga o‘xshaydi.
Muzey Budepashtdagi Varoshliget bog‘ida joylashadi. Uning umumiy maydoni 34 000 kvadrat metrni tashkil qiladi. Loyiha asosiy xususiyati — binoning atrof-muhit landshaftiga mos ravishda qurilishidir. Me’morlar binoni yer sathidan yengil ko‘tarilib boradigan yashil tom shaklida loyihalashgan. Mazkur yechim bog‘dagi barcha florani saqlab qolish va hattoki kengaytirish imkonini beradi.
Tashrif buyuruvchilar bino tomiga qiyalik orqali chiqishlari mumkin. Sun’iy qir cho‘qqisidan bog‘ va shaharga qaragan ajoyib manzara ochiladi. Binoning ichki qismida esa ko‘rgazma zallari, laboratoriyalar, turli ofislar joylashadi.
Muzey fasadi qisman shishadan iborat bo‘ladi, ushbu arxitektura yechimi shaffoflik effektini yaratadi va tabiiy yorug‘lik kirishini ta’minlaydi. Keng panorama derazalar esa eksponatlar bilan atrofdagi tabiat o‘rtasida vizual bog‘lanish yaratadi.
Loyiha ekologik muammolarni ham inobatga oladi. Yashillikka burkangan tom binoning ichki haroratini tartibga solishda va yomg‘ir suvini yig‘ishda yordam beradi. Tomda o‘rnatiladigan quyosh panellari muzey ehtiyojlari uchun elektr energiyasi ishlab chiqaradi.
Muzey ichki qismi esa eksponatlarni saqlash va namoyish etishning zamonaviy talablariga muvofiq tarzda quriladi. Bu yerda noyob kolleksiyalarni saqlash hamda ilmiy tadqiqotlar o‘tkazish uchun qulay sharoitlar yaratiladi. Ayniqsa, barcha toifadagi tashrif buyuruvchilar uchun qulaylikka alohida e’tibor qaratiladi: keng yo‘laklar va maxsus panduslar nogironligi bo‘lgan kishilar uchun ham erkin harakatlanish imkonini beradi.
Yangi muzey loyihasi — zamonaviy arxitekturaning tabiat bilan uyg‘unlashuvi namunasidir. Bino noyob eksponatlar saqlanadigan joy bo‘lish bilan birga, shahar landshaftining bir qismiga ham aylanishi ko‘zda tutilgan.
Qurilish ishlari yaqin orada boshlanishi rejalashtirilgan. Muzeyni topshirish sanasi hozircha aniq belgilanmagan, biroq ushbu loyiha allaqachon turli mutaxassislar va jamoatchilik e’tiborini tortmoqda, chunki yangi muzey tabiatni o‘rganish va ekologik ma’rifat markaziga aylanishi ham maqsad qilingan.
Vengriya tabiiy tarix muzeyi BIG kompaniyasi tomonidan taqdim etilgan birinchi ekologik loyiha emas. Byuro aynan shunday innovatsion yondashuvlari bilan tanilgan bo‘lib, bugungi kunda zamonaviy binolar va ularning shahardagi roli haqidagi avvalgi tasavvurlarni o‘zgartirib yubormoqda.
Izoh (0)