Копенгагеннинг BIG (Bjarke Ingels Group) архитектура бюроси Будапештда барпо этиладиган янги Венгрия табиий тарих музейининг лойиҳасини тақдим этди. Бянгин бино нафақат ўзининг экспонатлар коллекцияси, балки ғайриоддий экстерери билан ҳам ҳайратлантиради: унинг кўриниши табиат билан уйғун бўлиб, томи бўйлаб сайр қилиш мумкин қир-адирларга ўхшайди.
Музей Будепаштдаги Варошлигет боғида жойлашади. Унинг умумий майдони 34 000 квадрат метрни ташкил қилади. Лойиҳа асосий хусусияти — бинонинг атроф-муҳит ландшафтига мос равишда қурилишидир. Меъморлар бинони ер сатҳидан енгил кўтарилиб борадиган яшил том шаклида лойиҳалашган. Мазкур ечим боғдаги барча флорани сақлаб қолиш ва ҳаттоки кенгайтириш имконини беради.
Ташриф буюрувчилар бино томига қиялик орқали чиқишлари мумкин. Сунъий қир чўққисидан боғ ва шаҳарга қараган ажойиб манзара очилади. Бинонинг ички қисмида эса кўргазма заллари, лабораториялар, турли офислар жойлашади.
Музей фасади қисман шишадан иборат бўлади, ушбу архитектура ечими шаффофлик эффектини яратади ва табиий ёруғлик киришини таъминлайди. Кенг панорама деразалар эса экспонатлар билан атрофдаги табиат ўртасида визуал боғланиш яратади.
Лойиҳа экологик муаммоларни ҳам инобатга олади. Яшилликка бурканган том бинонинг ички ҳароратини тартибга солишда ва ёмғир сувини йиғишда ёрдам беради. Томда ўрнатиладиган қуёш панеллари музей эҳтиёжлари учун электр энергияси ишлаб чиқаради.
Музей ички қисми эса экспонатларни сақлаш ва намойиш этишнинг замонавий талабларига мувофиқ тарзда қурилади. Бу ерда ноёб коллекцияларни сақлаш ҳамда илмий тадқиқотлар ўтказиш учун қулай шароитлар яратилади. Айниқса, барча тоифадаги ташриф буюрувчилар учун қулайликка алоҳида эътибор қаратилади: кенг йўлаклар ва махсус пандуслар ногиронлиги бўлган кишилар учун ҳам эркин ҳаракатланиш имконини беради.
Янги музей лойиҳаси — замонавий архитектуранинг табиат билан уйғунлашуви намунасидир. Бино ноёб экспонатлар сақланадиган жой бўлиш билан бирга, шаҳар ландшафтининг бир қисмига ҳам айланиши кўзда тутилган.
Қурилиш ишлари яқин орада бошланиши режалаштирилган. Музейни топшириш санаси ҳозирча аниқ белгиланмаган, бироқ ушбу лойиҳа аллақачон турли мутахассислар ва жамоатчилик эътиборини тортмоқда, чунки янги музей табиатни ўрганиш ва экологик маърифат марказига айланиши ҳам мақсад қилинган.
Венгрия табиий тарих музейи BIG компанияси томонидан тақдим этилган биринчи экологик лойиҳа эмас. Бюро айнан шундай инновацион ёндашувлари билан танилган бўлиб, бугунги кунда замонавий бинолар ва уларнинг шаҳардаги роли ҳақидаги аввалги тасаввурларни ўзгартириб юбормоқда.
Изоҳ (0)