Madridning “Real” klubi UEFA Chempionlar Ligasi 2024/25-yilgi mavsumining chorak final bosqichidagi ilk uchrashuvda “Arsenal”ga 0:3 hisobida imkoniyatni boy berdi. Bu natija “qirollik klubi” uchun so‘nggi 16 yildagi eng yomon ko‘rsatkichlardan biriga aylandi. Bu haqda Opta Sport nashriga tayanib Championat xabar bermoqda.
Manbaga ko‘ra, “Real Madrid” 2009-yil martidan buyon ilk bor Chempionlar Ligasi doirasida ketma-ket ikki o‘yinda gol ura olmadi. O‘shanda, 1/8 final bosqichida Xuan de Ramos boshchiligidagi madridliklar “Liverpul”ga dastlab o‘z maydonida 0:1, so‘ngra safarda 0:4 hisobida yutqazgan edi. “Arsenal”ga qarshi bahsda bu antirekord takrorlandi.
Eslatib o‘tamiz, “Real” 1/8 final bosqichi javob o‘yinining asosiy va qo‘shimcha bo‘limlarida “Atletiko”ga 0:1 hisobida mag‘lub bo‘lgandi. Biroq penaltilar seriyasida 4:2 hisobida ustun kelib, keyingi bosqichga yo‘l olgan edi.
Ma’lumot uchun, ushbu jamoalar o‘rtasidagi javob bahsi 16-apreldan 17-aprelga o‘tar kechasi Madridda bo‘lib o‘tadi. Uchrashuv Toshkent vaqti bilan 00:00 da boshlanadi.
Izoh (0)