AQSHda so‘nggi oylardagi eng kuchli bo‘ronlar, suv toshqinlari va tornadolar oqibatida 15 kishi halok bo‘lgan. Tabiiy ofatlar Arkanzas va Kentukki kabi kamida beshta shtatga ta’sir ko‘rsatgan. Meteorologlar ma’lumotlariga ko‘ra, tabiiy ofat yana 41 million kishiga xavf solmoqda. Bu haqda The Washington Post nashri mahalliy xizmatlarga tayanib xabar bermoqda.
Nashrning yozishicha, hozirgacha beshta shtatda kamida 15 kishi halok bo‘lgan.
Arkanzas, Missuri, Tennessi va Missisipi shtatlarida suv toshqinlari tufayli to‘rtinchi xavf darajasi e’lon qilingan. Mamlakatning janubiy va janubi-sharqiy hududlari eng ko‘p zarar ko‘rgan. 6 mingdan ortiq reys bekor qilingan va kechiktirilgan. Ba’zi hududlarda shoshilinch evakuatsiya e’lon qilinib, elektr ta’minotida ommaviy uzilishlar yuz bergan va yo‘llar yopib qo‘yilgan.
Yomg‘ir ketma-ket uchinchi kun to‘xtamayapti, miqyosi hamda shiddati bo‘yicha misli ko‘rilmagan darajada yuqori.
Alabamada kuchli bo‘ron Talladiga shahridagi maktab avtobusini ag‘darib yuborgan va maktab binosini qisman vayron qilgan. Ta’lim muassasasining tomi uchirildi, derazalari sindirildi va binoning orqa qismi qulagan. Shuningdek, shahar ko‘chalarida tabiiy ofat oqibatlari — binolar vayronalari, shikastlangan avtomobillar va ildizi bilan qo‘porilgan daraxtlarni ko‘rish mumkin.
Izoh (0)