Parijdagi norozilik namoyishlari paytida talabalar aksiyasi ishtirokchilari AQSH bayrog‘ini yirtib, AQSH prezidenti Donald Tramp va uning tarif siyosatiga qarshi shiorlar aytishdi. Bu haqda “RIA Novosti” xabar bermoqda.
Ta’kidlanishicha, Parijda ta’lim sohasidagi to‘qqizta kasaba uyushmasining chaqirig‘iga binoan o‘qituvchilar va talabalar namoyishga chiqqan. Aksiya Ta’lim vazirligi oldidan boshlangan. Ishtirokchilar Fransiyaning sobiq bosh vaziri, hozirgi ta’lim vaziri Elizabet Bornni tanqid qiluvchi plakatlar ko‘tarib olishgan.
Ular axlat qutilariga o‘t qo‘yishgan, vitrinalar va bankomatlarni sindirishga urinishgan. Bir oz vaqt o‘tgach, aksiya ishtirokchilari politsiya qarshiligiga duch kelgan, biroq namoyishchilar to‘xtamay, huquq-tartibot xodimlariga qarata petardalar ota boshlagan. Tajovuzkor kayfiyatdagi namoyishchilarga qarshi javob chorasi sifatida politsiyachilar kaltak va ko‘zdan yosh oqizuvchi gazdan foydalangan.
3-aprel kuni davlat sektori xodimlarini milliy aksiyalarga CGT, UNSA, FSU va Solidaires kasaba uyushmalari chaqirdi. Norozilik namoyishlari davlat xizmatchilarining xarid qobiliyati pasayishiga qarshi o‘tkazilmoqda.
Bayonotda kasaba uyushmalari 2025-yilni “davlat sektori uchun qora yil” deb atadi. Ularning ta’kidlashicha, hukumat ish haqini indeksatsiya qilmasdan, ta’til to‘lovlarini kamaytirib va davlat xizmatlari sektori byudjetini qisqartirib, “ijtimoiy adolatsizlik” tufayli 64 yoshda pensiyaga chiqish bilan ularni ko‘proq ishlashga majburlamoqchi.
Xususan, ta’lim sohasi xodimlari boshlang‘ich va o‘rta maktablarda 250 ga yaqin o‘qituvchilik stavkalari qisqartirilgani, buning oqibatida 223 ta sinf yopilganini tanqid qilishdi. Shuningdek, ular pensiya islohotini bekor qilishni va ta’tillar uchun to‘liq to‘lovni talab qilmoqda.
Kasaba uyushmalari hukumat “davlat xarajatlari va ijtimoiy sug‘urta uchun 9,1 milliard yevro ajratishni bekor qilganini” mudofaa xarajatlari esa, aksincha, oshganini ta’kidladi.
Fransiyaning 2025-yil uchun ilgari qabul qilingan byudjeti davlat xarajatlarini jiddiy qisqartirishni nazarda tutadi. Shu bilan birga, harbiy xarajatlarning o‘sishi qayta ko‘rib chiqilmadi: mudofaa vazirligi qo‘shimcha 3,3 milliard yevro oladi, uning byudjeti 50,5 milliard yevroni tashkil etadi. Mudofaa vaziri Sebastyan Lekornyuning aytishicha, mamlakat mudofaa byudjetini deyarli ikki barobarga oshirib, yiliga 100 milliard yevroga yetkazishi kerak.
Bundan oldin Tramp ishlab chiqarish va milliy xavfsizlik uchun o‘ta muhim bo‘lgan tovarlardan tashqari, AQSHga yetkazib beriladigan barcha tovarlarga boj joriy etish qarorini e’lon qilgandi. Davlatlar uchun tariflar, hatto faqat pingvinlar yashaydigan hududlar uchun ham kamida 10 foizni, ba’zi mamlakatlar uchun esa 49 foizgacha bo‘ldi.
Izoh (0)