Amerikaning Air Products and Chemicals Inc kompaniyasi O‘zbekistonda bir qancha loyihalarni amalga oshirmoqchi. Bu haqda Investitsiyalar, sanoat va savdo vazirligi xabar berdi.
Keltirilishicha, 2-aprel kuni “Markaziy Osiyo – Yevropa Ittifoqi” sammiti arafasida investitsiyalar, sanoat va savdo vaziri Laziz Kudratov Air Products and Chemicals Inc kompaniyasi bosh ijrochi direktori Eduardo Menezes bilan uchrashdi.
Tomonlarning diqqat markazida foydalanishga topshirilgan loyihalarning samaradorligi, amalga oshirilayotgan va yangi istiqbolli va o‘zaro manfaatli tashabbuslarni hayotga tatbiq qilish masalalari bo‘ldi.
Laziz Kudratov kompaniyaning O‘zbekistondagi muvaffaqiyatli tajribasini ta’kidladi. 2019-yildan buyon kompaniya mamlakat hududlarida umumiy qiymati 1,15 milliard dollar bo‘lgan uchta yirik investitsiya loyihasini amalga oshirdi. Ular orasida Farg‘ona neftni qayta ishlash zavodida vodorod ishlab chiqarish va “Navoiyazot” AJda suyuq karbonat angidrid gazini ishlab chiqarish.
Bugungi kunda kompaniya Buxorodagi MTO majmuasida kislorod va azot ishlab chiqarish bo‘yicha loyihalarni amalga oshirmoqda va 200 million dollardan ortiq sarmoya kiritgan. Majmua plastmassa, avtomobilsozlik va qurilish kabi sohalarni metanol va olefin bilan ta’minlashga mo‘ljallangan.
Uglerodni ushlash va saqlash, aviatsiya yoqilg‘isi ishlab chiqarish va ko‘mirni gazlashtirish bo‘yicha yangi loyihalar ham ko‘rib chiqilmoqda.
Uchrashuv yakunlari bo‘yicha tomonlar hamkorlikni yanada chuqurlashtirishga o‘zaro tayyor ekanliklarini tasdiqladi va joriy loyihalarni muvaffaqiyatli yakunlash hamda yangi loyihalarni amalga oshirish doirasida samarali hamkorlik qilish mexanizmlarini ishlab chiqdi.
Keyingi yillarda AQSH bilan tovar ayirboshlash va investitsiyalar hajmi bir necha barobar ortdi, biznes kooperatsiyasi kuchaymoqda.
Toshkent shahrida Vebster universiteti va Amerika texnologiya universiteti faoliyat ko‘rsatmoqda.
Bundan tashqari, transport, bojxona, migratsiya, madaniyat va boshqa ustuvor yo‘nalishlarda o‘zaro manfaatli hamkorlik amalga oshirilmoqda.
Izoh (0)