АҚШда сўнгги ойлардаги энг кучли бўронлар, сув тошқинлари ва торнадолар оқибатида 15 киши ҳалок бўлган. Табиий офатлар Арканзас ва Кентукки каби камида бешта штатга таъсир кўрсатган. Метеорологлар маълумотларига кўра, табиий офат яна 41 миллион кишига хавф солмоқда. Бу ҳақда The Washington Post нашри маҳаллий хизматларга таяниб хабар бермоқда.
Нашрнинг ёзишича, ҳозиргача бешта штатда камида 15 киши ҳалок бўлган.
Арканзас, Миссури, Теннесси ва Миссисипи штатларида сув тошқинлари туфайли тўртинчи хавф даражаси эълон қилинган. Мамлакатнинг жанубий ва жануби-шарқий ҳудудлари энг кўп зарар кўрган. 6 мингдан ортиқ рейс бекор қилинган ва кечиктирилган. Баъзи ҳудудларда шошилинч эвакуация эълон қилиниб, электр таъминотида оммавий узилишлар юз берган ва йўллар ёпиб қўйилган.
Ёмғир кетма-кет учинчи кун тўхтамаяпти, миқёси ҳамда шиддати бўйича мисли кўрилмаган даражада юқори.
Алабамада кучли бўрон Талладига шаҳридаги мактаб автобусини ағдариб юборган ва мактаб биносини қисман вайрон қилган. Таълим муассасасининг томи учирилди, деразалари синдирилди ва бинонинг орқа қисми қулаган. Шунингдек, шаҳар кўчаларида табиий офат оқибатлари — бинолар вайроналари, шикастланган автомобиллар ва илдизи билан қўпорилган дарахтларни кўриш мумкин.
Изоҳ (0)