Россия қўшинлари 6 апрель куни Киевга ракеталар билан ҳужум қилди. Оқибатда камида уч киши жароҳатланди. Бу ҳақда шаҳар мэри Виталий Кличко хабар берди.
Киевнинг Дарницкий туманида қутқарувчилар бир кишининг жасадини аниқлади. Шаҳарнинг Дарницкий, Соломенский ва Оболонский туманларида ёнғинлар содир бўлди. Нотурар жой биноси қулаб тушиб, бир нечта автомашиналарга зарар етказди. Бизнес-марказ биноси қисман шикастланди.
Қутқарувчиларнинг маълум қилишича, ҳужум оқибатида жами уч киши жабрланган, улардан икки нафари касалхонага ётқизилган. Бундан ташқари, Россия армияси Харьков вилоятидаги Купянск шаҳри аҳолиси яшайдиган ҳудудларига авиабомбалар ташлаган. Оқибатда икки киши жароҳат олган. Бомбалардан бири тўққиз қаватли турар жой биносига тушган. Олтита балкон ва умумий майдони 100 квадрат метр бўлган тўртта квартира ёниб кетган.
Шунингдек, хусусий ва кўп қаватли турар жой бинолари шикастланган. Украина Қуролли Кучлари ҳужум пайтида тўққизта Х-101/Х-55СМ ракетасидан олтитаси, саккизта “Калибр”дан олтитаси, олтита “Искандер”дан биттаси ва 109 та дрондан 40 таси уриб туширилганини маълум қилди.
Зеленский муносабати
Украина президенти Владимир Зеленскийнинг сўзларига кўра, ўтган ҳафта давомида Россия қўшинлари Украинага 1460 дан ортиқ бошқариладиган авиабомбалар, 670 га яқин зарба берувчи дронлар ва 30 дан ортиқ турли русумдаги ракеталар учирган.
Россияга босим ҳалигача етарли эмас ва Россиянинг Украинага кунлик зарбалари буни исботламоқда. Бу кеча — Киевга қарши баллистика, вилоят бўйлаб зарба берувчи дронлар учирилди. Шунингдек, Николаев, Суми, Харьков, Хмелницкий ва Черкас вилоятларига зарба берилди. Шунинг учун босим пасайиши мумкин эмас. Хавфсизликни таъминлаш ва тинчликни яқинлаштириш учун барча кучларни йўналтириш лозим, деди Зеленский.
Изоҳ (0)