Britaniya Antarktika xizmati olimlari Antarktidada 65 yil oldin vafot etgan sayyoh va tadqiqotchi Dennis Bellning jasadini aniqladi. Uni muzlik chekinishi natijasida ochilgan qoyalar orasidan topishgan.
25 yoshli Bell 1959-yil 26-iyulda Antarktika yarimoroli qirg‘oqlariga ilmiy ekspeditsiyaga yo‘l olgan. U hamkasbi Jeff Stoks bilan birga King-Jorj orolida tadqiqot ishlarini olib borayotganda, bir kuni muz va qor orasidagi 30 metrlik yoriqqa tushib ketgan. Uni qutqarish uchun qilingan barcha urinishlar natijasiz qolgan.
Falokatdan keyin 65 yildan ortiq vaqt davomida Bellning jasadi bedarak yo‘qolgan deb hisoblangan. Biroq 2025-yilning yanvar oyida tadqiqotchilar u halok bo‘lgan Admirallik ko‘rfazi hududini o‘rganishga borishgan. Ular qoyalar va muzlar orasidan inson suyaklarini topishgan, so‘ngra ularni Folklend orollariga, u yerdan esa Londonga jo‘natishgan.
Mutaxassislar DNK tahlilini o‘tkazishgan. Genetik material Bellning aka-ukasi va singlisi Devid va Valerining namunalari bilan taqqoslangan va o‘xshashliklar aniqlangan.
Tadqiqotchining aka-singlisi bu kashfiyotdan “lol qolganliklarini” aytishmoqda.
Hozirda Avstraliyada istiqomat qilayotgan Devid Bellning ta’kidlashicha, Dennis ko‘p qirrali inson bo‘lib, bir safar radiopriyomnikni noldan yig‘gan ekan. U Angliyaga qaytib, akasining jasadini dafn etishni rejalashtirmoqda. O‘sha ekspeditsiya paytida Bell bilan birga bo‘lgan Jeff Stouksga kelsak, u jasad topilishidan bir necha hafta oldin vafot etgan.
Bundan avval Pokistonning tog‘li Ko‘histon mintaqasida 28 yil oldin bedarak yo‘qolgan erkak jasadi eriyotgan muzlik orasidan topilgandi.
Izoh (0)