Xitoyning SF Airlines aviakompaniyasi Toshkentga yuk tashishni yo‘lga qo‘ydi. Bu haqda Transport vazirligi xabar berdi.
Unga ko‘ra, 2025-yil 2-aprelda Xitoyning SF Airlines aviakompaniyasi Lanchjou-Toshkent-Lanchjou yo‘nalishi bo‘yicha ilk yuk reysini amalga oshirdi. Boeing 757 samolyoti mahalliy vaqt bilan soat 10:40 da Toshkent xalqaro ayeroportiga qo‘ndi va anʼanaga ko‘ra suv arkasi bilan kutib olindi.
Dastlabki bosqichda parvozlar haftasiga ikki marta amalga oshiriladi, keyinchalik ularning sonini ko‘paytirish rejalashtirilmoqda.
SF Airlines aviakompaniyasi Shenchjen shahrida (Xitoyning Guandun viloyati) joylashgan bo‘lib, Xitoyning yetakchi yuk tashuvchi aviakompaniyasi hisoblanadi. U 2005-yilda tashkil etilgan va mamlakatdagi yirik logistika xoldinglaridan biri - SF Holding Company Limited tarkibiga kiradi.
Xitoy korporatsiyasi O‘zbekistonda temiryo‘l, aviatsiya va yo‘l infratuzilmalarini rivojlantirishda ishtirok etmoqchi.
Xitoylik investorlar rejalashtirgan loyihalar
2024-yilning iyunida Xitoy kompaniyasi Farg‘onada yirik avtomobilsozlik majmuasini barpo etishi xabar berilgan edi. China Xiaou Group rahbari bilan o‘tkazilgan muzokaralarda ushbu loyihaning dastlabki bosqichida 50 million dollar investitsiya hisobiga yig‘ish, bo‘yash, sozlash liniyalarini yo‘lga qo‘yib, yiliga 60 mingta gaz, elektr va gibrid motorli avtomobillar hamda maxsus transport vositalari ishlab chiqarilishi belgilangandi.
Ikkinchi bosqichda 350 million dollar va uchinchi bosqichda 1,1 milliard dollar investitsiya yo‘naltirilib, butlovchi qismlarning ko‘pi mahalliylashtirilishi hamda ishlab chiqarilayotgan avtomobillarning soni 110 mingtaga yetkazilishi ko‘zda tutilgan. Loyiha 5 yil davomida to‘la yakunlanishi rejalashtirilgan.
Xitoyning mashinasozlik sohasida ilg‘or kompaniyalaridan biri bo‘lgan Zhejiang Yizhou Machinery Technology kompaniyasi viloyat hududida qurilish sanoati uchun uskunalar ishlab chiqarishni rejalashtirmoqda.
Baishan Zhongtian Development kompaniyasi tomonidan Farg‘ona shahrida besh yulduzli mehmonxona va savdo markazi majmuasini barpo etish ko‘zda tutilgan.
Bundan tashqari, China CAMC Engineering kompaniyasi O‘zbekistonda birinchi chiqindilarni yoqish zavodini qurmoqchi. Xitoyning JC Finance Interconnect Holdings kompaniyasi esa ta’lim va kasbga tayyorlash o‘quv markazini ochmoqchi.
Xitoylik investorlar Farg‘ona viloyatining Quvasoy sanoat zonasida 2025-yilning yakuniga qadar “Tulpor” savdo belgisi ostida traktorlar ishlab chiqarishni ham yo‘lga qo‘ymoqchi.
Izoh (0)