“Oshin”ning O‘zbekistondagi namoyishiga 25 yil to‘ldi: serial bosh qahramonini gavdalantirgan aktrisaning taqdiri qanday kechdi?

O‘zbek ayollariga juda yaqin timsol “Oshin”, juda kuchli va hech qachon taslim bo‘lmaydigan, yuzida tabassum bilan doimo yaxshi hayotga intilgan, ammo kamtar va sadoqatli obraz sifatida 2000-yildan buyon o‘zbek kinoixlosmandlarining qalbidan joy olib kelmoqda. Oshinning o‘rta yoshlardagi davrini ijroni etgan Yuko Tanaka shaxsiy hayotida befarzand bo‘lishiga qaramay, serialda farzandi uchun hamma narsaga tayyor ona rolini juda ishonarli va mohirona ijro etgan.

Kinodagi ilk qadamlar

Yuko Tanaka 1955-yilda Yaponiyaning Osaka shahrida dunyoga kelgan. U Meydzi universitetini tamomlagan ko‘p qirrali aktrisa.

1979-yilda, Tanaka faoliyatining boshlanishida NHK televideniyesining “Opa Ma” drama serialida, 1981-yilda “Eydzanaika” tarixiy dramasida bosh rollarni ijro etgan. Tanaka ushbu ikki filmdagi rollari uchun bir qator mukofotlarga ega bo‘lgan, jumladan, Yaponiya Kino akademiyasining “Ikkinchi darajali eng yaxshi aktrisasi” mukofoti va “Yilning eng yaxshi yangi ijodkori” mukofotlariga loyiq deb topilgan.

“Oshin” rolidagi muvaffaqiyatlari

1983-yilda Yaponiyaning NHK telekanali o‘zining 30 yilligini nishonlash arafasida “Oshin” nomli yangi serialni namoyish etdi. Bu mamlakat tarixidagi eng ko‘p tomosha qilingan seriallardan biri bo‘lgan va u 68 ta boshqa davlatda ingliz tilidan arab tiligacha bo‘lgan subtitrlar bilan namoyish etilgan.

O‘sha paytlarda Yaponiyada serialning o‘rtacha yillik tomoshabinlari soni 52,6 foizni tashkil etgan bo‘lsa, “Oshin”ning birgina qismining eng yuqori reytingi 62,9 foizga yetgan. Oshin qatʼiyat ramzi bo‘lib, hatto eng qiyin paytlarda inson hech qachon taslim bo‘lmasligi kerakligini ko‘rsatgan tarbiyaviy ahamiyatga ega filmdir. Uni nafaqat yaponlar, balki butun dunyo xalqlari yaxshi ko‘rgan.

Serial 1900-yilda tug‘ilgan, kambag‘allik va yomon munosabatlarga duch kelgan, lekin keyingi hayotida muvaffaqiyat va baxtga erishgan dehqon qizi Oshinning hayotini hikoya qiladi. Bolalikdagi Oshin rolini Ayako Kobayashi o‘ynagan, lekin Tanaka katta Oshin rolini o‘z zimmasiga olgan. Serial 1983-yilning aprelidan 1984-yilning martigacha deyarli 300 ta 15 daqiqalik qismlarda namoyish etilgan va uning eng yuqori reytingi (62,9 foiz) uni “yapon televideniyesi tarixidagi eng mashhur drama”ga aylantirgan.

“Oshin”dan keyin Tanaka badiiy filmlarga qaytdi va 1985-yilning fevralida Shochiku tomonidan suratga olingan “Kapone ko‘p yig‘laydi” komediyasida, 1985-yilning avgustida Ken Takakuraga qarshi “Demon” dramasida bosh rollarni o‘ynadi. Tanaka ushbu ikki film uchun Yaponiya Kino akademiyasining “Eng yaxshi ikkinchi darajali ayol roli” nominatsiyasiga ega bo‘lgan.

Keyingi o‘n yil davomida Tanaka asosan televideniyeda ishladi va o‘nlab televizion filmlarda va Meydzi tiklanish davri haqidagi NHK’ning hashamatli tarixiy seriali “Go‘yoki uchgandek”da ishtirok etdi. Ushbu serial 1990-yilning yanvaridan dekabrigacha 48 ta qismda namoyish etilgan.

1988-yilning mayida Tanaka Emili Brontening klassik romani asosida rejissyor Yosishige Yosida tomonidan suratga olingan “Momaqaldiroqli dovon” filmida Kino (romanda Ketrin) rolini o‘ynadi. Filmning voqealari o‘rta asrlar Yaponiyasida sodir bo‘ladi.

Shaxsiy hayot

Tanaka 1982-yilgi “Tora-san, mutaxassis” filmida birgalikda suratga tushgan qo‘shiqchi va aktyor Kenzi Savada bilan tanishgan, shuningdek, ular 1985-yilda “Kapone ko‘p yig‘laydi” filmida birgalikda rol o‘ynashgan.

O‘sha paytda Savada qo‘shiqchi Emi Itoga uylangan edi, lekin ular 1987-yilda ajrashishgan. So‘ng Tanaka va Savada 1989-yilning noyabrida turmush qurishgan va hozirga qadar birgalikda baxtli turmush kechirishmoqda.

Ijodiy tanaffusdan so‘ng

Tanaka 2001-yilda Yasuo Furuhata tomonidan suratga olingan Ikkinchi jahon urushidan keyingi yapon oilalari haqidagi “Chiroq” dramasida Ken Takakura bilan birgalikda bosh rolni o‘ynagan. Film Yaponiya Kino akademiyasi mukofotining 13 ta nominatsiyasiga, jumladan, Tanaka “Eng yaxshi ayol roli” nominatsiyasiga sazovor bo‘lgan.

Aktrisaning keyingi kinodagi roli 2005-yilning iyulida chiqqan “Sutchi” romantik dramasida sut yetkazib beruvchi bo‘lib, o‘zining sobiq sevgilisini uchratgan ellik yoshli yolg‘iz ayol rolini o‘ynadi. Ushbu filmdagi roli uchun u 2006-yilda Yaponiya Professional kino mukofotlari marosimida “Eng yaxshi ayol roli” mukofotiga sazovor bo‘lgan.

Shundan so‘ng Tanaka televideniyega qaytib, NHK’ning “Pleyadlar” tarixiy dramasida beva qolgan imperator xonim Tsi rolini o‘ynadi. Xitoy-Yaponiya hamkorligida ishlab chiqarilgan ushbu film 2010-yilning yanvaridan iyuliga qadar Yaponiyada 28 qismda va 2010-yilning martida Xitoyda namoyish etilgan, ikkala versiya ham yuqori reytinglarga ega bo‘lgan.

“Oshin” O‘zbekistonda namoyish etilganiga 25 yil to‘ldi

“Oshin” O‘zbekistondagi birinchi yapon televizion dublyaj ishlaridan sanaladi. Unga qadar Yaponiya seriallaridan birortasi o‘zbekchaga dublyaj qilinmagan. “Oshin” televideniyeda namoyish qilingach, ilk qismlaridanoq reytingi ancha yuqorilagan. Tomoshabinlarning deyarli barchasiga manzur kelgan va O‘zbekistonning turli hududlaridan minnatdorlik maktublari kelardi. Serial 2020-yilda, karantin paytida qayta namoyish etildi. 

Serialning dublyaj rejissyori Shamsiddin Hisomiddinov uni ovozlashtirish jarayonlari haqida “Daryo”ga bergan intervyusida so‘zlab bergandi. 

Yurtimiz mustaqillikka erishgan ilk yillarda Yaponiya va O‘zbekiston o‘rtasidagi ko‘plab sohalarni mustahkamlashga katta ahamiyat qaratilgan. Madaniy aloqalarning amaldagi namunasi sifatida Yaponiya hukumati “O‘zbekiston” telekanaliga “Oshin” serialining ingliz tilidagi variantini sovg‘a qilgan, degan edi u. 

Dublyajda aktyorlar: Omon Abdurazzoqov, Oybarchin Bakirova, Sanjar Sa’dullayev, Sayyora Yunusova va Gulchehra Jamilova ishtirok etgan. Ular qahramonlarning ruhiy holatini his qilib ovoz berishgani uchun ham hozirgacha serial dublyajini ko‘pchilik e’tirof etadi.

Serial bosh qahramonini o‘zbek tilida gapirtirgan aktrisa Sayyora Yunusova bu uning ilk marta serial qahramoniga ovoz berish tajribasi bo‘lganini eslaydi. 

2000-yilga qadar ham kino va multfilm qahramonlariga ovoz berib yurganman. “Oshin” esa dublyajdagi birinchi serialim bo‘lib, unda bosh qahramon Oshin va bir qancha aktrisalarning o‘zbekcha gapirishiga hissa qo‘shganman. Bilasizmi, ko‘pincha biror teleserialning ovozlashtirish jarayonida aksariyat aktyorlar sizga yordam bergisi kelmaydi. Kichkina xato qilsangiz ham, boshqacha nafas olib qo‘yishadi yoki qarashi o‘zgaradi. “Oshin”ga ovoz berish paytida juda qiynalganman. Chunki bu katta qismli film edi. Ammo atrofimdagi tajribali dublyaj aktyorlarining qo‘llab-quvvatlashi tufayli vazifamni sifatli bajarishga intilganman. Ayniqsa, rahmatli Oybarchin opam hamisha dalda bo‘lib, meni ruhlantirib turardi, degan edi aktrisa.

Anora Gulyamova tayyorladi