Xitoylik investorlar Farg‘ona viloyatining Quvasoy sanoat zonasida “Tulpor” savdo belgisi ostida traktorlar ishlab chiqarishni yo‘lga qo‘ymoqchi.
Viloyat hokimligi matbuot xizmatining ma’lum qilishicha, Xayrullo Bozorov xitoylik investor Yuan Yanpin boshchiligidagi delegatsiya a‘zolarini qabul qildi. Uchrashuvda Quvasoy shahridagi sanoat zonasida umumiy loyiha qiymati 100 million dollar bo‘lgan, birinchi bosqichda 30 million dollar sarflanishi ko‘zda tutilgan traktorlar ishlab chiqarish loyihasini boshlash masalasi muhokama qilindi.
Xitoylik hamkorlar bilan Farg‘ona traktor ishlab chiqarish korxonasi ro‘yxatdan o‘tkazildi. 2025-yilning yakuniga qadar “Tulpor” milliy brendi asosida bir nechta rusumdagi traktorlar ishlab chiqariladi. Korxona tom qismiga 2 megavatt elektr energiyasi ishlab chiqarish quvvatiga ega quyosh panellari o‘rnatiladi va mustaqil o‘zini elektr bilan ta’minlaydi.
Ikki bosqichli loyihaga ko‘ra, birinchi bosqichda traktorlar ishlab chiqaruvchi zavod quriladi va keyingi bosqichda butlovchi qismlar tayyorlash va texnik xizmat ko‘rsatish yo‘lga qo‘yiladi. Ishlab chiqarish samaradorligini oshirish va mahsulot sifatini yaxshilash maqsadida smart texnologiyalardan foydalaniladi. Traktorlar mahalliy va xorijiy xaridorlarga yetkazib beriladi.
Dastlabki bosqichda 250 ta ish o‘rni yaratilishi ko‘zda tutilgan.
Xitoylik investorlar rejalashtirgan loyihalar
2024-yilning iyunida Xitoy kompaniyasi Farg‘onada yirik avtomobilsozlik majmuasini barpo etishi xabar berilgan edi. China Xiaou Group rahbari bilan o‘tkazilgan muzokaralarda ushbu loyihaning dastlabki bosqichida 50 million dollar investitsiya hisobiga yig‘ish, bo‘yash, sozlash liniyalarini yo‘lga qo‘yib, yiliga 60 mingta gaz, elektr va gibrid motorli avtomobillar hamda maxsus transport vositalari ishlab chiqarilishi belgilangandi.
Ikkinchi bosqichda 350 million dollar va uchinchi bosqichda 1,1 milliard dollar investitsiya yo‘naltirilib, butlovchi qismlarning ko‘pi mahalliylashtirilishi hamda ishlab chiqarilayotgan avtomobillarning soni 110 mingtaga yetkazilishi ko‘zda tutilgan. Loyiha 5 yil davomida to‘la yakunlanishi rejalashtirilgan.
Xitoyning mashinasozlik sohasida ilg‘or kompaniyalaridan biri bo‘lgan Zhejiang Yizhou Machinery Technology kompaniyasi viloyat hududida qurilish sanoati uchun uskunalar ishlab chiqarishni rejalashtirmoqda.
Baishan Zhongtian Development kompaniyasi tomonidan Farg‘ona shahrida besh yulduzli mehmonxona va savdo markazi majmuasini barpo etish ko‘zda tutilgan.
Bundan tashqari, China CAMC Engineering kompaniyasi O‘zbekistonda birinchi chiqindilarni yoqish zavodini qurmoqchi. Xitoyning JC Finance Interconnect Holdings kompaniyasi esa ta’lim va kasbga tayyorlash o‘quv markazini ochmoqchi.
Izoh (0)