Xitoy Tayvan mustaqilligi tarafdorlari uchun “jiddiy ogohlantirish” sifatida orol atrofida harbiy mashg‘ulotlar boshladi. Bu haqda Reuters xabar berdi.
Mashg‘ulotlarda barcha qo‘shin turlari, jumladan, armiya, flot, aviatsiya va raketa kuchlari ishtirok etmoqda. Tayvan Mudofaa vazirligiga ko‘ra, 1-aprel kuni orol yaqinida Xitoyning 19 ta harbiy kemasi qayd etilgan. Shuningdek, “Shandun” kemasi boshchiligidagi aviatashuvchilar guruhining faolligi kuzatilgan.
Xitoy kemalari Tayvanning harbiy javob hududiga kirgan. Ushbu hudud Tayvan bo‘g‘ozining markazi va orolning sharqiy havo mudofaa chegarasi orasida joylashgan.
Mashg‘ulotlarda asosiy e’tibor dengiz va havoda jangovar shaylikni tekshirish, har tomonlama nazoratni qo‘lga olish, dengiz va quruqlikdagi nishonlarga zarbalar berish, muhim hududlar va yo‘nalishlar ustidan nazorat o‘rnatishga qaratilgan, deyiladi xabarda.
Mashg‘ulotlar aks etgan videolarda Tayvan prezidenti Lay Sindze “parazit” deb atalgan. Kadrlardan birida u yonayotgan Tayvan ustida tayoqchalarda ushlab turilgan animatsion qo‘ng‘iz ko‘rinishida tasvirlangan. Boshqasida esa butun orol bo‘ylab parazitlarni ko‘paytiradigan qo‘ng‘iz ko‘rinishida.
Parazit Tayvan orolini zaharlamoqda. Parazit orolni vayron qilmoqda. Parazit uzil-kesil yo‘q qilishga intiladi, deyiladi animatsiyada.
Tayvan mudofaa vaziri Vellington Ku Xitoyning bunday ritorikasi tinchlikka hissa qo‘shmasligini va “ularning provokatsion xususiyatini ko‘rsatishini” aytdi. U jurnalistlarga bergan izohida Xitoy mintaqadagi tinchlik va barqarorlikni buzish o‘rniga o‘zining korrupsiya bilan bog‘liq muammolarini hal qilishga e’tibor qaratishi kerakligini qo‘shimcha qildi.
Tayvan Mudofaa vazirligi 1-aprel kuni Xitoyning xatti-harakatlariga javoban harbiy samolyot va kemalarga tegishli topshiriqlar berib, yer usti raketa tizimlarini ishga tushirganini e’lon qildi.
Xitoy Tayvanni o‘z hududining bir qismi sifatida ko‘radi va mustaqillik rasman e’lon qilingan taqdirda kuch ishlatishni istisno qilmaydi.
Biz mustaqillik e’lon qilmaymiz, chunki Tayvan allaqachon mustaqil davlat, deya ta’kidladi Tayvan prezidenti Lay Sinzde.
Xitoy rasmiylari, o‘z navbatida, Tayvan bilan qayta birlashish yo‘lidan borayotganini aytmoqda.
Xitoyning Tayvan masalasini hal qilish va birlashuvga erishish istagi qoyadek mustahkam, degan Xitoyning orol ishlari bo‘yicha idorasi rasmiy vakili Chju Fenlyan.
Izoh (0)