Gollivudning mashhur yulduzlari ko‘plab filmlarda asosiy rollarni ijro etgan bo‘lsalar-da, ammo jangari filmlar aktyorlari sifatida eslanadi.
Jeki Chan
Boshqa ko‘plab xitoy va gonkonglik aktyorlar singari Jeki Chan ham avvaliga mahalliy kinematografiyada ish boshlab, “Politsiyachilar tarixi” hamda boshqa bir nechta filmlarda rol o‘ynadi. Biroq boshqalardan farqli o‘laroq Chan Gollivudda ham muvaffaqiyat qozondi — Jeki Kris Taker bilan “Tig‘iz vaqt” filmida ikkinchi asosiy rolni ijro etdi. Qizig‘i shundaki, bu rol Jekining filmografiyasida muhim ahamiyatga ega bo‘lishiga qaramay, film unga faqat shuhrat va pul keltirgan, ammo hech qanday zavqni his qilmagan.
Bryus Uillis
Bryus Uillis Sibill Shepard bilan “Oy nuri detektiv agentligi” serialida rol o‘ynaganidan so‘ng yulduzga aylandi. Yakuniy mavsumdan oldin Bryus “O‘tda yonmas” filmida ishtirok etib, jangovar filmlarga bo‘lgan iste’dodini kashf etdi va butun faoliyatini shu janrga bog‘ladi. Shu bilan birga, u “Oltinchi his”, “O‘n ikki maymun“, “Kichkintoy” va boshqa filmlarda turli janrlarda ham o‘zini namoyon qildi. 2010-yillarda Uillisning karyerasida burilish yuz berdi — u aktyorlik faoliyatiga hech qanday foyda keltirmagan past byudjetli jangovar filmlarda rol o‘ynay boshladi. 2020-yillarda hatto “Oltin malina” mukofotining alohida nominatsiyasini qo‘lga kiritdi. Biroq, keyinchalik ma’lum bo‘lishicha, Bryus afaziyaga chalingan ekan, bu kasallik uning xotirasini, shuningdek, nutqni idrok etish va ifodalash qobiliyatini butunlay izdan chiqargan.
Silvestr Stallone
1970-yillarda Silvestr Stallone kichik rollarda o‘ynab, arzimas pul topardi. Shu sababli u hatto boqishga qurbi yetmagan itini sotishga majbur bo‘ladi. Shunday bo‘lsa-da, Stallonega “Rokki” filmi umrining qolgan qismini betashvish o‘tkazishga yetadigan 225 million dollar daromad keltirdi va Stallone butun dunyoga mashhur bo‘lib uyg‘ondi. Keyinchalik u “Rembo” filmida suratga tushadi. Bundan tashqari, 2010-yilda u “Tutqich bermaslar” nomli yangi filmlar turkumini ishga tushirdi, ammo uning to‘rtinchi qismi kinoprokatda muvaffaqiyatsizlikka uchradi va atigi 50 million dollar yig‘di.
Arnold Shvarsenegger
Arnold Shvarsenegger kulturist sifatida nom qozonganidan so‘ng, o‘ziga xos rollarni ijro eta boshladi. Keyinchalik yosh rejissyor Jeyms Kemeron Shvarseneggerga terminator rolini taklif qiladi, ammo Arnold dialogsiz rol ijro etishni istamagani uchun rad etadi. Biroq Kemeron Arnini ishontira oladi va bu uning karyerasidagi eng to‘g‘ri qaror bo‘ladi. Keyinchalik Shvarsenegger “Egizaklar”, “Hammasini eslash”, “Kommando” filmlarida suratga tushadi. “Terminator”ning davomiy qismida katta gonorar olgan aktyor “Terminator 3: mashinalar qo‘zg‘oloni”da yanad ko‘proq pul ishlab oladi.
Jeyson Steytem
Yoshligida Jeyson Steytem suzuvchilik bilan shug‘ullangan va hatto terma jamoaga qabul qilingan, keyinchalik esa modellik qilib, Tommy Hilfiger va boshqa taniqli kompaniyalar bilan hamkorlik qilgan. Qiziq tomoni shundaki, Steytem “Kartalar, pullar, ikkita to‘pponcha” filmidagi ilk rolini modellik tajribasi tufayli emas, balki bir paytlar bozorda ishlagan va o‘z qahramonini ishonchli tarzda gavdalantira olgani uchun olgan. To‘rt yildan so‘ng u “Yuk tashuvchi” filmida rol ijro etib, Gollivudda jangari filmlar aktyori sifatida mustahkam o‘rin egalladi. Jeyson filmografiyasida “Adrenalin”, “Mexanik”, “Ayg‘oqchi”, “Meg: tubsizlik maxluqi” va “Meg 2: tubsizlik”, “Inson qahri”, “Asalarichi”, shuningdek, “Forsaj” turkumidagi bir nechta filmlar mavjud.
Liam Nison
Liam Nison avvalo jangovar va jinoiy filmlardagi rollari bilan eslanadi, biroq karyerasining ilk davrida u “Shindler ro‘yxati” va “Haqiqiy muhabbat” kabi filmlar orqali dramatik janrda ham o‘zini ko‘rsatgan edi. Ammo Nison jangari filmlarga shunchalik berilib ketdiki, uning mashhur “Shindler ro‘yxati” kam tilga olinadigan bo‘lib qoldi. U o‘z filmografiyasini “Qor tozalovchi”, “Olishuv”, “Professional”, “So‘nggi yollanma askar”, “Havo marshali” va “Soyalar o‘yini” kabi filmlar bilan to‘ldirdi.
Jan-Klod Van Damm
Jan-Klod Van Damm turli ishlarda ishlayotgan paytida, unga “Chekinmaslik va taslim bo‘lmaslik” filmida asosiy rollardan birini o‘ynash taklif qilinadi. Shundan so‘ng u “Yirtqich” nomli jangovar filmda ishtirok etadi, bir yil o‘tgach esa butun hayotidagi asosiy filmga aylangan “Qonli sport”da suratga tushdi. Keyingi bir necha yil ichida Jan-Klod “Yolg‘iz bo‘ri”, “Nishon”, “Qochishga joy yo‘q”, “Ko‘cha jangchisi”, “Universal askar” va “Qo‘sh zarba” filmlarida rol o‘ynadi. Ammo tomoshabinlarning jangovar filmlarga qiziqishi pasayishi tufayli Van Damm o‘zini boshqa yo‘nalishlarda izlay boshladi. Shunday qilib, 2008-yilda u “J.K.V.D.” dramatik jangovar filmida rol o‘ynab, o‘zini yana bir bor namoyon qilishga muvaffaq bo‘ldi.
Izoh (0)