Farg‘ona viloyati hokimi Xayrullo Bozorov Xitoyning Ding Li group, Shandong develop new material, Zhejiang Yizhou Machinery Technology, Teeyer kompaniyalari vakillari bilan uchrashuv o‘tkazdi. Bu haqda viloyat hokimligi matbuot xizmati xabar berdi.
Maʼlum qilinishicha, muloqotda Farg‘onadagi kichik sanoat zonalari va “Qo‘qon” EIZ, shuningdek, erkin iqtisodiy zonada xorijiy investorlar uchun yaratilgan sharoitlar hamda qonunchilik bilan belgilangan imtiyozlar xususida so‘z borgan.
Xitoyning mashinasozlik sohasida ilg‘or kompaniyalaridan biri bo‘lgan Zhejiang Yizhou Machinery Technology kompaniyasi rahbari Jan Lixyu, Farg‘onada MDH davlatlari hamda arab mamlakatlariga chiqish uchun qulay imkoniyat mavjudligidan kelib chiqqan holda viloyat hududida qurilish sanoati uchun uskunalar ishlab chiqarishni rejalashtirayotganini maʼlum qildi.
Xitoyda gazobeton bloklar ishlab chiqarish sanoatida 50 foizga yaqin ulushga ega bo‘lgan Teeyer kompaniyasi vakillari esa dastlabki hisob-kitoblarga ko‘ra 15 mln dollar atrofida investitsiya yo‘naltirgan holda ushbu qurilish bloklarini Farg‘onada ishlab chiqarish rejalarini bayon qildi.
Uchrashuvda, shuningdek, viloyatda tashkil etilishi ustida ish olib borilayotgan Xitoy texnoparki hududiga xitoylik tadbirkorlarning loyihalarini joylashtirish borasida hamkorlik yuzasidan ham o‘zaro fikr almashildi.
Izoh (0)