Хитойнинг SF Airlines авиакомпанияси Тошкентга юк ташишни йўлга қўйди. Бу ҳақда Транспорт вазирлиги хабар берди.

Унга кўра, 2025 йил 2 апрелда Хитойнинг SF Airlines авиакомпанияси Ланчжоу-Тошкент-Ланчжоу йўналиши бўйича илк юк рейсини амалга оширди. Boeing 757 самолёти маҳаллий вақт билан соат 10:40 да Тошкент халқаро аеропортига қўнди ва анъанага кўра сув аркаси билан кутиб олинди.
Дастлабки босқичда парвозлар ҳафтасига икки марта амалга оширилади, кейинчалик уларнинг сонини кўпайтириш режалаштирилмоқда.
SF Airlines авиакомпанияси Шэньчжэнь шаҳрида (Хитойнинг Гуандун вилояти) жойлашган бўлиб, Хитойнинг етакчи юк ташувчи авиакомпанияси ҳисобланади. У 2005 йилда ташкил этилган ва мамлакатдаги йирик логистика холдингларидан бири - SF Holding Company Limited таркибига киради.
Хитой корпорацияси Ўзбекистонда темирйўл, авиация ва йўл инфратузилмаларини ривожлантиришда иштирок этмоқчи.
Хитойлик инвесторлар режалаштирган лойиҳалар
2024 йилнинг июнида Хитой компанияси Фарғонада йирик автомобилсозлик мажмуасини барпо этиши хабар берилган эди. China Xiaou Group раҳбари билан ўтказилган музокараларда ушбу лойиҳанинг дастлабки босқичида 50 миллион доллар инвестиция ҳисобига йиғиш, бўяш, созлаш линияларини йўлга қўйиб, йилига 60 мингта газ, электр ва гибрид моторли автомобиллар ҳамда махсус транспорт воситалари ишлаб чиқарилиши белгиланганди.
Иккинчи босқичда 350 миллион доллар ва учинчи босқичда 1,1 миллиард доллар инвестиция йўналтирилиб, бутловчи қисмларнинг кўпи маҳаллийлаштирилиши ҳамда ишлаб чиқарилаётган автомобилларнинг сони 110 мингтага етказилиши кўзда тутилган. Лойиҳа 5 йил давомида тўла якунланиши режалаштирилган.
Хитойнинг машинасозлик соҳасида илғор компанияларидан бири бўлган Zhejiang Yizhau Machinery Technology компанияси вилоят ҳудудида қурилиш саноати учун ускуналар ишлаб чиқаришни режалаштирмоқда.
Baishan Zhongtian Development компанияси томонидан Фарғона шаҳрида беш юлдузли меҳмонхона ва савдо маркази мажмуасини барпо этиш кўзда тутилган.
Бундан ташқари, China CAMS Engineering компанияси Ўзбекистонда биринчи чиқиндиларни ёқиш заводини қурмоқчи. Хитойнинг JS Finance Interconnect Holdings компанияси эса таълим ва касбга тайёрлаш ўқув марказини очмоқчи.
Хитойлик инвесторлар Фарғона вилоятининг Қувасой саноат зонасида 2025 йилнинг якунига қадар “Тулпор” савдо белгиси остида тракторлар ишлаб чиқаришни ҳам йўлга қўймоқчи.
Изоҳ (0)