Toshkent shahrida dollarni so‘mga almashtirishda fuqaroga 3 mln so‘m kam pul bergan shaxs ushlandi. Bu haqda poytaxt IIBB matbuot xizmati xabar berdi.
Maʼlum qilinishicha, muqaddam o‘g‘rilik, firibgarlik jinoyatlari uchun sudlanib, turli jazolarga tortilgan B. 2023-yilning 26-iyul kuni Chilonzor tumani, 16-mavzesida joylashgan bank oldidagi bankomatdan pul almashtirmoqchi bo‘lgan.
U fuqaro A.ning yoniga kelib, arzonroqqa almashtirish taklifini beradi. Fuqaro A. unga 700 dollarni so‘mga almashtirmoqchi ekanligini aytadi.
Fuqaro B. avval 500 dollar uchun kelishilgan pulni berib, so‘ng 200 dollar uchun hisob-kitob qilayotgan A.ga oldin berilgan pullarni ushlab turish bahonasida olib, 8 mln 169 ming so‘mdan 3 mln so‘mni olib qolgan.
Fuqaro A. yo‘lda pulning kamligini bilib qoladi va ichki ishlar organlariga murojaat qiladi.
Jinoyat ishlari bo‘yicha Chilonzor tuman sudi ochiq sud majlisida fuqaro B.ning jinoiy qilmishlariga qonunan baho berib, uni Jinoyat kodeksining 168-moddasi 3-qismi “b” bandi (firibgarlik) bilan aybli deb topdi.
Uning oilaviy ahvoli, qilmishidan pushaymonligi, yetkazilgan zararni to‘liq qoplaganligini inobatga olib, ish haqining 20 foizini davlat daromadi hisobiga ushlab qolgan holda, 2 yilga axloq tuzatish ishlari jazosiga hukm qildi.
Izoh (0)