Surxondaryo va Andijon viloyatlarida valyuta ayirboshlash bilan noqonuniy shug‘ullanib kelgan shaxslar ushlandi, deb xabar beradi Bosh prokuratura huzuridagi departament.
Qayd etilishicha, departamentning Shahrixon tuman bo‘limi, DXX va IIB xodimlari hamkorligida tezkor tadbir o‘tkazilgan. Tadbirda valyuta ayirboshlash bilan shug‘ullanib kelgan S.R. fuqaro M.T.ga 5,1 ming dollarni 64,7 million so‘mga sotgan vaqtida ushlangan. Shuningdek, S.R.ning yonidan jami 8 240 dollar, 39,2 ming Rossiya rubli, 50 yevro va 33,2 million so‘m ashyoviy dalil sifatida olingan.
Shu kabi, departamentning Sho‘rchi tuman bo‘limi tomonidan o‘tkazilgan tezkor tadbirda valyuta ayirboshlash bilan shug‘ullanib kelgan shaxslar O‘.M va B.M. fuqaro M.X.ga jami 3,1 ming dollarni 39,4 million so‘mga sotgan vaqtida ushlanib, ularning yonidan 10,6 ming Rossiya rubli, 3,5 million so‘m va 10 dollar ashyoviy dalil sifatida olingan.
Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.
- Avvalroq Andijon va Qashqadaryo viloyatlarida valyuta qimmatliklarining noqonuniy muomalaga kiritilishiga chek qo‘yilgani to‘g‘risida xabar berilgandi.
- Shuningdek, Buxoro va Xorazm viloyatlarida valyuta qimmatliklarining noqonuniy muomalaga kiritilishi oldi olingan edi.
Izoh (0)