Andijon viloyatining Marhamat, Qashqadaryo tumanining Koson va Nishon tumanlarida valyuta qimmatliklari savdosi bilan shug‘ullanib kelgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Marhamat tumanida fuqaro A.Yu. 3 ming dollarni 39 mln so‘mga sotgan vaqtida ushlanib, undan jami 5 410 dollar, 51 600 rubli, 13 450 Qirg‘iz somi va 16,4 mln so‘m pullar ashyoviy dalil sifatida olingan.
Shuningdek, Koson tumanida fuqaro P.M. 3 300 dollarni 42,7 mln so‘mga sotib olgan vaqtida ushlanib, undan jami 2 800 dollar va 93,3 mln so‘m pullar ashyoviy dalil sifatida olingan.
Shu bilan birga, Nishon tumanida fuqaro D.K. va boshqalar fuqaro B.T.ga 3 400 dollarni 44,2 mln so‘mga sotgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.
Qo‘lga olinayotgan “valyutchik”lar
Avvalroq Buxoro, Xorazm va Toshkent viloyatlarida valyuta qimmatliklari savdosi bilan shug‘ullanib kelgan shaxslar ushlangan edi. Shuningdek, Andijon viloyatining Baliqchi hamda Oltinko‘l, Buxoro viloyatining Peshku tumanida valyuta qimmatliklari savdosi bilan shug‘ullanib kelgan shaxslar ushlangan.
Shu bilan birga, Samarqand viloyatining Ishtixon hamda Oqdaryo tumanlarida valyuta qimmatliklarini noqonuniy muomalaga kiritilishining oldi olingan.
Bundan tashqari, Samarqand viloyatining ikki tumani, shuningdek, Xorazm viloyatining Yangibozor tumanida valyuta ayirboshlash bilan shug‘ullanib kelgan shaxslar ushlangan.
Izoh (0)