Yaponiyaning Sidzuka prefekturasi okrug sudi 47 yildan ortiq nohaq qamoqda o‘tirgan va keyinchalik oqlangan 89 yoshli Ivao Hakamataga taxminan 217 million iyena (taxminan 1,44 million dollar) tovon to‘lashga qaror qildi. Bu haqda The Mainichi xabar berdi. Hakamata 1966-yilda Sidzuoka prefekturasida to‘rt kishidan iborat oilani o‘ldirganlikda ayblanib, o‘lim jazosiga hukm qilingan. Ammo 2024-yil oktyabr oyida o‘tkazilgan takroriy sud jarayonida u oqlangan. Sud tergov organlari dalillarni soxtalashtirganini aniqlagan. Jabrlanuvchining advokati Hakamata 47 yil va yetti oy davomida nohaq hibsda saqlanganini ta’kidladi. U tovon puli talab qilib, 2025-yil yanvar oyida sudga murojaat qildi. Bayonotda, erkak hali ham qamoq jazosidan aziyat chekayotgani aytilgan. Sud tovon to‘lash talabini qabul qilgan, erkak taxminan 33 yil o‘lim jazosini kutib, “g‘oyat kuchli” ruhiy va jismoniy azob-uqubatlarni boshdan kechirgani ta’kidlangan. Hakamataga sud tomonidan belgilangan tovon miqdori Yaponiya tarixidagi eng yuqori ko‘rsatkich bo‘ldi. Huquqiy himoyachilari Sidzuoka prefekturasi va milliy hukumatga qarshi ham da’vo qo‘zg‘atishni rejalashtirmoqda. Yaponiyalik fuqaroning advokati sudning tovon to‘lash haqidagi qarorini sharhlar ekan, hokimiyat vakillari “200 million iyena bilan qoplab bo‘lmaydigan jinoyat” sodir etganini ta’kidladi.
Mavzuga doir
×![Lightbox Image]()
Izoh (0)