Тошкент шаҳрида долларни сўмга алмаштиришда фуқарога 3 млн сўм кам пул берган шахс ушланди. Бу ҳақда пойтахт ИИББ матбуот хизмати хабар берди.
Маълум қилинишича, муқаддам ўғрилик, фирибгарлик жиноятлари учун судланиб, турли жазоларга тортилган Б. 2023 йилнинг 26-июль куни Чилонзор тумани, 16-мавзесида жойлашган банк олдидаги банкоматдан пул алмаштирмоқчи бўлган.
У фуқаро А.нинг ёнига келиб, арзонроққа алмаштириш таклифини беради. Фуқаро А. унга 700 долларни сўмга алмаштирмоқчи эканлигини айтади.
Фуқаро Б. аввал 500 доллар учун келишилган пулни бериб, сўнг 200 доллар учун ҳисоб-китоб қилаётган А.га олдин берилган пулларни ушлаб туриш баҳонасида олиб, 8 млн 169 минг сўмдан 3 млн сўмни олиб қолган.
Фуқаро А. йўлда пулнинг камлигини билиб қолади ва ички ишлар органларига мурожаат қилади.
Жиноят ишлари бўйича Чилонзор туман суди очиқ суд мажлисида фуқаро Б.нинг жиноий қилмишларига қонунан баҳо бериб, уни Жиноят кодексининг 168-моддаси 3-қисми “б” банди (фирибгарлик) билан айбли деб топди.
Унинг оилавий аҳволи, қилмишидан пушаймонлиги, етказилган зарарни тўлиқ қоплаганлигини инобатга олиб, иш ҳақининг 20 фоизини давлат даромади ҳисобига ушлаб қолган ҳолда, 2 йилга ахлоқ тузатиш ишлари жазосига ҳукм қилди.
Изоҳ (0)