Portugaliya prezidenti Marselu Rebelu di Souza respublika parlamentini tarqatib yuborish va 18-may kuni o‘tkaziladigan muddatidan oldingi saylovlarni tayinlash to‘g‘risidagi farmonni imzoladi. Bu haqda Prezident matbuot xizmati xabar berdi.
“Respublika prezidenti bugun respublika assambleyasini tarqatib yuborish va parlament saylovlarini 18-mayga belgilash to‘g‘risidagi farmonni imzoladi”, deyiladi xabarda.
Prezidentning parlamentni tarqatib yuborish to‘g‘risidagi qarori 11-mart kuni deputatlar fevralda boshlangan siyosiy inqiroz fonida bosh vazir Luish Montenegru boshchiligidagi hukumatga ishonchsizlik bildirganidan so‘ng qabul qilindi.
Mamlakatdagi siyosiy inqiroz bosh vazir oilasiga tegishli konsalting kompaniyasi bilan bog‘liq manfaatlar to‘qnashuvi haqidagi ayblovlar tufayli yuzaga kelgan.
Muxolifatning ta’kidlashicha, firma xususiy kompaniyalar bilan foydali shartnomalar tuzgan. Montenegruning o‘zi esa bu ayblovlarni rad etmoqda. Gap Montenegru siyosatga qaytishidan oldin asos solgan va hozirda uning oilasi tomonidan boshqarilayotgan Spinumviva kompaniyasi faoliyati haqida bormoqda.
Portugaliya bosh vaziri hukumat tepasida bir yildan kamroq faoliyat yuritdi. Undan oldingi Bosh vazir Antonio Koshta korrupsiya mojarosi tufayli iste’foga chiqqan edi. Shunday qilib, 18-mayda o‘tkaziladigan saylovlar mamlakatdagi 2022-yildan beri uchinchi navbatdan tashqari saylov hisoblanadi.
Portugaliya konstitutsiyaga ko‘ra, bir palatali parlament (Respublika assambleyasi) barcha Portugaliya fuqarolarini vakillik qiladigan organ hisoblanadi. U eng kamida 180 va ko‘pi bilan 230 deputatdan tashkil topishi mumkin. Hozirgi kunda parlament 230 deputatdan iborat tarkibda bo‘lib faoliyat yuritmoqda.
Izoh (0)