Yevropa Kengashi parlament assambleyasi (PACE) Golodomorni Ukraina xalqining genotsidi sifatida tan oldi.
“Tegishli mulohazalarni hisobga olgan holda, Assambleya Golodomorni ukrain millati, tili va madaniyati asoslarini yo‘q qilishga qaratilgan genotsid akti sifatida tan olishga qaror qiladi va uning qurbonlari xotirasiga hurmat bajo keltiradi”, — deyiladi PACE qarorida.
PACE assambleyaga aʼzo davlatlar parlamentlarini Golodomorni genotsid deb tan olish to‘g‘risidagi rezolyutsiyalarni qabul qilishga chaqirdi.
Ukraina prezidenti Vladimir Zelenskiy ushbu qarori uchun PACE’ga minnatdorchilik bildirdi:
“1932—1933 yillardagi Golodomorni Ukraina xalqining genotsidi sifatida tan olgani uchun PACE’dan minnatdorman. Tarixiy adolat va Golodomor qurbonlari xotirasini tiklash Moskvaning o‘tmishdagi va hozirgi jinoyatlari uchun adolatli jazo muqarrar ekaniga aniq signal beradi”.
Golodomor genotsid sifatida
SSSRda Stalin hukmronligi davrida amalga oshirilgan qishloq xo‘jaligini majburiy kollektivlashtirish oqibatida 1932—1933-yillarda mamlakatda ommaviy ocharchilik yuzaga keldi, uning qurbonlari millionlab odamlarga yetdi. Ukraina bu falokat Sovet Ittifoqi rahbariyati tomonidan ataylab qo‘zg‘atilganini ta’kidlaydi.
Golodomor uzoq vaqtdan beri Ukraina va Rossiya o‘rtasidagi asosiy bahs mavzusi bo‘lib kelgan. Moskva Kiyevning yirik ocharchilik qurboni faqat ukrainaliklar bo‘lgan degan fikrini rad etib, Markaziy Osiyo va Rossiyadagi millionlab odamlar ham ocharchilikdan jabr ko‘rganini aytadi.
2006-yilda Ukraina Oliy Radasi Golodomorni Ukraina xalqiga qarshi genotsid akti deb e’lon qilgan. Bir necha yillar davomida Ukraina rasmiylari xalqaro maydonda Golodomorni genotsid sifatida rasman tan oldirishga urinib kelmoqda. Urush fonida ba’zi davlatlar bu qarorni qo‘llab-quvvatladi.
Golodomorni Ukraina xalqining genotsidi sifatida rasman tan olgan davlatlar ro‘yxatiga AQSH, Kanada, Avstraliya, Portugaliya, Meksika, Braziliya, Fransiya, Islandiya va boshqalar kiradi.
Izoh (0)