Portugaliya parlamenti masofadan ishlashni tartibga soluvchi yangi qoidalarni qabul qildi. Euronews xabariga ko‘ra, xususan, menejerlarga ish vaqtidan tashqari qo‘l ostidagilarni bezovta qilish taqiqlandi, aks holda ular jarimaga torilishi mumkin.
Shuningdek, yangi qoidalarga ko‘ra, masofadan ishlaydigan xodimlar o‘z xizmat vazifalarini bajarishga sarflaydigan elektr energiyasi va internet xarajatlari uchun qisman kompensatsiya olish huquqiga ega.
Endilikda rahbariyat 8 yoshdan kichik farzandi bor xodimlariga, ularning xohishiga qarab, masofadan turib ishlash uchun ruxsat berishga majbur.
Shu bilan birga, parlament a’zolari xodimlarga ish vaqtidan tashqari ishga oid chatlar va messenjerlarni qonuniy ravishda yopish imkoniyatini beruvchi “aloqadan uzilish huquqini” mustahkamlash to‘g‘risidagi taklifni rad etdi.
Qoidalarda, shuningdek, ish beruvchilar kamida ikki oyda bir marta xodimlar bilan shaxsiy uchrashuvlar tashkil etishi shart, bu ishchilarning o‘zini muloqotdan mahrum bo‘lgandek his qilmasligini ta’minlash uchun zarur.
Yangi qoidalar faqat 10 dan ortiq kishi ishlaydigan kompaniyalarga tegishli.
Portugaliya mehnat va aholini ijtimoiy muhofaza qilish vaziri Ana Mendes Godinyoning aytishicha, yangi qoidalar, jumladan, masofadan turib ishlaydigan va yashash joyini o‘zgartirish istagida bo‘lgan yuqori malakali chet elliklarni mamlakatga ko‘proq jalb qilishga yordam beradi.
COVID-19 pandemiyasi tufayli dunyo bo‘ylab ko‘plab kompaniyalar o‘z xodimlarini masofadan ishlashga o‘tkazdi. Bunday qaror hukumat buyrug‘i bilan ham, iqtisodiy nuqtayi nazardan kelib chiqib ham belgilanishi mumkin bo‘ldi. Jumladan, Rossiyada bir qator yirik kompaniyalar koronavirus tufayli o‘rnatilgan barcha cheklovlar olib tashlanganidan so‘ng ham barcha xodimlarni ish joyiga qaytarishni rejalashtirmaganini, aksincha ularning bir qismini masofaviy ishda qoldirmoqchiligini e’lon qildi.
Izoh (0)