Braziliya deganda birinchi bo‘lib nima xayolga keladi? Seriallar, quyosh, tabassumli odamlar, futbol. Va, albatta, karnaval va o‘ziga xos urf-odatlar va an’analar. Quyida bu haqda batafsil to‘xtalamiz.
Taomlar
- Braziliyaliklar asosan guruch, dukkakli mahsulotlar va ularning turli xil birikmalarini iste’mol qiladi.
- Odatdagi tushlik mana shunday ko‘rinishda bo‘ladi.
- Braziliyaga kelib, albatta churrasko yeb ko‘rish kerak. Uni kabobning analogi desa ham bo‘ladi.
- Braziliya restoranlarini shunday tasvirlashadi: “Xizmat ko‘rsatish paytida ofitsiantlar stolingizga bir metr uzunlikdagi sixda (“espeto” deb ataladi) mol va tovuq go‘shtining turli xillarini olib kelishadi. Bularning barchasi issiq, hozirgina grilda pishirilgan bo‘ladi. Ular to‘yib ovqatlanmaguningizcha kichik bo‘laklar yoki porsiyalarni uzatib turishadi”.
Shirinxo‘rlarga kokosli konfetlarni tatib ko‘rishni tavsiya etamiz. Bu shirinlik “kokada” deb ataladi. Uni tayyorlash uchun kokos qirindisi, quyultirilgan sut va eritilgan shakar yog‘da qovuriladi.
Karnaval
- Braziliya karnavali Portugaliya va Afrika madaniyatlarining tutashgan joyida vujudga kelgan. Birinchi karnaval 1723-yilga to‘g‘ri keladi.
- Qirol Momo — Riodagi karnavalni ochib beradigan afsonaviy mavjudot. Odatda uni baland bo‘yli mashhur shaxs ijro etadi. Qirol Momo ishora bermaguncha bayram boshlanmaydi.
- Karnavalning qiroli bo‘lganidan keyin albatta qirolichasi ham bo‘lishi kerak. Uni har yili saylab oladilar. Qirolicha o‘zining go‘zalligi va eng muhimi, samba raqsini mahorat bilan ijro eta olishi bilan tanilgan.
- Ko‘pchilik karnavalda qatnashish zavqli ekanligini eshitgan, ammo uning naqadar qimmat ekanligini kamdan-kam odam tasavvur qila oladi. Ayrim samba maktablari liboslar va tayyorgarlik uchun 4 million dollardan ortiq mablag‘ sarflaydi.
- Karnaval 2 hafta, ba’zi shaharlarda esa bir oy davom etadi. Unda nafaqat professional raqqoslar, balki har kim yasanib, xursandchilik qilishi mumkin.
To‘y marosimlari
- Braziliyalik juftliklar uchun to‘y hayotlaridagi eng muhim kun sanaladi. Ko‘pincha to‘yga ikki yuz va undan ortiq mehmon taklif etiladi, bu esa katta xarajatlarni talab qiladi. Eng ko‘p mablag‘ taom, ichimlik va to‘y tortiga sarflanadi.
- To‘yda dasturxonga deyarli ovqat qo‘yilmaydi. Buning o‘rniga mehmonlar hashamatli shved stolidagi taomlarni o‘zlari tanlab oladi.
- Ko‘pchilik braziliyaliklar tortning birinchi bo‘lagini kelin yeyishi lozimligiga ishonishadi. Bu er-xotinning farzandli bo‘lishini kafolatlaydi deb hisoblanadi. Bu lahzaning surati Braziliya oilalarining har bir to‘y albomida albatta mavjud bo‘ladi.
- Turmushga chiqmagan qizlarning oila qurishiga yordam bermoqchi bo‘lgan kelin to‘y libosining etagiga dugonalarining ismlarini tikib qo‘yadi.
- Asal oyiga pul yig‘ish uchun kuyov bo‘yinbog‘idan bo‘laklar kesib, mehmonlarga sovg‘a qiladi, buning evaziga esa pul oladi.
Yangi yil
- Yangi yil arafasida Braziliyada ko‘plab odamlar sohilga borib, yarim tunda okeanga sakraydi. Bu yerda yetti to‘lqinni tutish omad keltiradi deb hisoblanadi. Har bir to‘lqinga bitta tilak tilash mumkin.
- Yangi yil kechasi hamma oq kiyim kiyadi. Ammo ichki kiyim rangli bo‘lishi shart. Har bir rangning o‘z ma’nosi bor. Masalan, braziliyalik ayollar karyerada muvaffaqiyatga erishish uchun to‘q sariq, sevgisini uchratish istagida bo‘lganlar pushti, sog‘liq uchun esa yashil rangli ichki kiyim kiyishadi.
- Yangi yil bayramida ko‘plab braziliyaliklar omad keltirishi uchun cho‘ntaklarida dafna bargi olib yurishadi.
Sohil
- Braziliya — dengiz va quyosh mamlakati. Plyajga yolg‘iz kelsangiz, hatto birinchi marta ko‘rayotgan bo‘lsangiz ham, yoningizdagi odamdan narsalaringizga qarab turishni so‘rash odat tusiga kirgan.
- Agar odamlar qarsak chalsa — bu yomon alomat. Bu bola yo‘qolganini anglatadi. Shuning uchun plyajda qarsak ovozini eshitgan har bir kishi, muammoga e’tiborni tortish uchun qarsak chala boshlaydi.
Izoh (0)