Italiyada koronavirus sababli yangi cheklovlar joriy qilinishi kutilmoqda

Italiya hukumati koronavirus bilan kasallanish holatlarining ortishi munosabati bilan yangi cheklov choralarini qabul qilishga majbur bo‘lmoqda. Bu haqda Italiya bosh vaziri Juzeppe Konte 2-noyabr kuni parlament quyi palatasi yig‘ilishida ma’lum qildi, deb yozmoqda “Interfaks”.

“Kasallanish holatlarining ortishi biz uchun yangi cheklov choralarini tayyorlash va ularni chorshanba kunigacha qabul qilishni zarur qilib qo‘ydi”, — deya ma’lum qilgan bosh vazir.

Uning qayd etishicha, mamlakatning 15 ta hududida bir oy ichida intensiv terapiya bo‘limlarining kasallarni qabul qilish imkoniyatlari tugab qolishi mumkin.

Kontening taklifiga ko‘ra, barcha muzeylarni yopish va butun mamlakat bo‘yicha shoular o‘tkazishni to‘xtatish, shuningdek, dam olish kunlari savdo markazlari ishini taqiqlash kerak. Maktablarning o‘rta va katta sinflar o‘quvchilari masofaviy ta’limga o‘tadi. Jamoat transportidagi yo‘lovchilar soni ikki baravarga kamaytirilishi kerak.

Shuningdek, cheklovlar qatoridan butun mamlakat bo‘ylab mahalliy vaqt bilan soat 21:00 dan keyin boshlanadigan komendantlik soati ham joy olishi kerak. Ana shu vaqtda ishlashi kerak bo‘lgan kishilar uchun bu cheklovdan istisno hisoblanadi.

Bosh vazirning ta’kidlashicha, mazkur tadbirlarning tafsilotlarini har bir hududdagi epidemiologik vaziyatga bog‘liq ravishda moslashtirish kerak bo‘ladi.

Italiyada so‘nggi bir necha kun davomida COVID-19 bilan kasallanish bo‘yicha kuniga taxminan 30 mingta holat qayd etilmoqda.

Worldometers sayti ma’lumotlariga ko‘ra, Italiyada pandemiya boshidan buyon koronavirus bilan kasallanish bo‘yicha 709 335 ta holat qayd etilgan. Kasallanganlarning 38 826 nafari vafot etgan, 292 380 kishi kasallikdan tuzalgan.