21-iyul kuni O‘zbekistonda raqamli savodxonlikni oshirish, IT ta’limni rivojlantirish va kelajak kasblariga tayyorgarlikni kuchaytirish maqsadida "IT va raqamli ta’limni rivojlantirish forumi" tashkil etildi. Forum doirasida sohadagi eng dolzarb masalalar muhokama qilinib, yangi tadqiqot natijalari e’lon qilindi.
Forum “O‘zbekistonda IT va raqamli ta’lim landshaftini yaxshilash: Tadqiqot bosqichi” loyihasining natijalariga bag'ishlangan bo'lib, O‘zbekistonning raqamli ta’lim va IT sohasidagi ishchi kuchini rivojlantirishga qaratilgan keng qamrovli tashabbusning bir qismidir.
Ushbu bosqichda keng qamrovli tadqiqot ishlari olib borilishi nazarda tutilgan bo‘lib, keyingi bosqichlar uchun mustahkam zamin yaratishga xizmat qiladi. Keyingi bosqichlarda maxsus ta’lim dasturlari, o‘qituvchilar uchun salohiyatni oshirish dasturlari va talabalar uchun kasbiy ko‘mak mexanizmlari yo‘lga qo‘yiladi.
Aholining IT savodxonligida mavjud bo‘shliqlarni aniqlash va ta’lim resurslarini mehnat bozorining ehtiyojlariga moslashtirish orqali ushbu ko‘p bosqichli tashabbus malakali va inklyuziv raqamli ishchi kuchini shakllantirishga xizmat qiladi.
IT ta’lim uyushmasi NNT va Shveysariya taraqqiyot va hamkorlik agentligi hamkorligida amalga oshirilgan mazkur loyiha O‘zbekistonda raqamli iqtisodiyot sari bosqichma-bosqich harakat qilish jarayonida aholining raqamli savodxonligini oshirish va IT sohasida sifatli ta’limni yo‘lga qo‘yishga qaratilgan.
Loyiha 2024-yilning sentyabr oyida boshlangan bo‘lib, aholining IT savodxonligi va malakasidagi bo‘shliqlarni tahlil qilish: Turli demografik guruhlar orasida IT savodxonlik darajasini o‘rganish, hudud, jins, yosh va ijtimoiy-iqtisodiy holat bo‘yicha tafovutlarni aniqlashga qaratilgan.
Loyihaning asosiy maqsadlari O‘zbekistonda IT va raqamli savodxonlikni oshirish hamda ijtimoiy himoyaga muhtoj guruhlar – jumladan, yoshlar, qishloq aholisi, ayollar, nogironlar va kam ta’minlangan oilalar vakillarining IT ko‘nikmalari darajasini aniqlash. Birinchi bosqich quyidagilarga qaratilgan:
- Aholi orasida IT savodxonligining hozirgi darajasini baholash.
- IT sektori ish beruvchilarining ehtiyojlarini aniqlash.
- Keyingi 10 yil davomida IT va raqamli sohada istiqbolli kasblarni belgilash, bu orqali ta’lim rejalashtirish va kadrlar tayyorlash yo‘nalishlarini shakllantirish.
Loyihaning tadqiqot bosqichi doirasida 2025 yil mart–iyun oylari mobaynida tashkil etilgan onlayn va oflayn shaklda o‘tkazilgan so‘rovnomada mamlakatning turli hududlaridan 4 mingdan ortiq fuqaro ishtirok etdi.
Forumda loyihadan olingan natijalar sarhisob qilindi va ommaga taqdim etildi, jumladan:
- 2025-yil fevral–may oylari mobaynida “O‘zbekistonda raqamli savodxonlik darajasini aniqlash” bo‘yicha onlayn va oflayn shaklda tashkil etilgan so‘rovnoma natijalari:
Tadqiqotning eng e’tiborga molik tomoni — ishtirokchilar orasida erkaklar va ayollar soni deyarli teng (50,7%-ayollar, 49.3%-erkaklar) bo‘lgan. Buni shunchaki raqam emas — buni O‘zbekistonda IT sohasiga qiziquvchilar orasidagi gender tenglik sifatida baholash mumkin.
So‘rovnomada ishtirok etganlar o‘z IT ko‘nikmalarini quyidagicha baholagan:
17% — a’lo
44% — yaxshi
32% — qoniqarli
Masofaviy ish yoki o’qish uchun videoaloqa vositalaridan foydalanish ko’rsatgichi haqida so’ralganda, qariyb 57 foiz so’rovnoma ishtirokchilari deyarli har hafta videoaloqa vositalaridan foydalanishlarini bildirgan.
Bundan tashqari 78 foiz ishtirokchilar har oy Elektron hukumat tizimlaridan foydalanishi aniqlangan.
Quyidagi raqamlarga e’tibor bering:
- 96% ishtirokchi IT sohasiga o‘z qiziqishini bildirgan
- 97% esa raqamli ko‘nikmalar ish sifatiga bevosita ijobiy ta’sir ko‘rsatishini ta’kidlagan.
52.4 foiz aholi oyiga 2-3 marta Marketpleys va ijtimoiy tarmoq orqali onlayn xarid amalga oshirishini bildirgan, 25 foiz aholi yiliga 2-3 marta va 22 foiz aholi hech qachon onlayn xarid amalga oshirmasligini bildirgan.
Forumda mutaxassislar tomonidan ishlab chiqilgan va mehnat bozori tahliliga asoslangan TOP-45 IT kasbdan iborat “Kelajak kasblari atlasi” taqdim etildi. Ushbu atlas yoshlarga, ota-onalarga, ta’lim tashkilotlariga va kadrlar siyosatida ishtirok etuvchi tashkilotlarga amaliy yo‘nalish berishga qaratilgan.
Shuningdek Forum doirasida Tadqiqot natijalarini markazlashtirish, bepul IT ta’lim resurslarini joylashtirish va kasbiy yo‘naltirishni ta’minlaydigan DigiSurvey.uz onlayn platformasi taqdimoti ham bo‘lib o‘tdi.
Tadbir davomida IT Park, Raqamli ta’limni rivojlantirish Markazi, AlmaU va boshqa tashkilotlardan mutaxassislar ishtirokida panel muhokamalar, ta’limdagi innovatsiya va startaplar haqida sessiyalar, netvorking, mahorat darslari va interaktiv o‘yinlar ham tashkil etildi.
Loyihaning hamkor tashkilotlari sifatida O‘zbekiston Respublikasi Raqamli texnologiyalar vazirligi, IT Park O‘zbekiston, Raqamli ta’limni rivojlantirish markazi, O‘zbekiston nogironlar assotsiatsiyasi, IT Ladies hamjamiyati hamda Yoshlar ishlari agentligi ishtirok etdi.
Izoh (0)