Joriy yil I yarmida O‘zbekistonda 60 va 70 yoshdan o‘tib ota bo‘lganlar soni qisqardi. Bu haqda Adliya vazirligi tarqatgan infografikadan ko‘rish mumkin.
Nikoh va tug‘ilishlar statistikasi
2025-yil yanvar-iyun oylarida O‘zbekistonda 95 ming 270 ta nikoh qayd etildi. Shundan 30 yoshgacha tuzilgan nikohlar 76 ming 324 ta, 50 yoshdan o‘tib qurilgan oilalar 669 ta bo‘lgan.
Birinchi marta farzandli bo‘lgan ayollarning o‘rtacha yosh ko‘rsatkichi 23 yoshni tashkil etgan. O‘tgan davrda ona bo‘lganlardan 3 ming 178 nafari 40 yoshdan oshgan, 42 nafari 45 yoshdan o‘tgan, 8 nafari 50 yoshdan keyin farzand ko‘rgan.
Olti oy davomida mamlakatda jami 10 ming 317 nafar egizak tug‘ilgan. Ularning eng ko‘pi Samarqand viloyatida (1 ming 253 nafar), eng kam ko‘rsatkich esa Navoiy viloyatida (262 nafar).
Hududlar bo‘yicha eng ko‘p tug‘ilish Samarqand (48 ming 769 ta), Farg‘ona (45 ming 508 ta) va Qashqadaryo (44 ming 257 ta) viloyatlarida qayd etilgan. Eng kam ko‘rsatkich esa Jizzax (17 ming 708 ta), Navoiy (11 ming 434 ta) hamda Sirdaryo (10 ming 23 ta) viloyatlarida kuzatilgan.
Keksayganda ota bo‘lganlar
Mamlakatda olti oy davomida 60 yoshdan katta bo‘lgan 257 nafar fuqaro birinchi marta ota bo‘lgan. Bu o‘tgan yil mos davridagidan 155 nafarga kam.
2025-yil yanvar-iyun oylarida 70 yoshdan katta 17 nafar otaxon ilk bor farzand ko‘rgan. Taqqoslash uchun, 2024-yil I yarmida bunday bobo–otalar soni 34 nafarni tashkil etgan.
Yarim yil ichida yoshi 50 dan o‘tib ota bo‘lganlar soni 1 ming 394 kishiga yetdi. O‘tgan yilning ilk olti oyida bu ko‘rsatkich 2 ming 309 ta edi.
Izoh (0)