25 davlat tashqi ishlar vazirlari va Yevropa Ittifoqining tenglik, tayyorgarlik va inqirozlarni boshqarish bo‘yicha komissari Aja Lyabib Isroilni G‘azo sektoridagi urushni to‘xtatishga va u yerga gumanitar yordam yetkazilishiga yo‘l ochishga da’vat etdi. Bu haqda Buyuk Britaniya Tashqi ishlar vazirligi tarqatgan qo‘shma bayonotda ma`lum qilindi.
“Biz, quyida imzo chekuvchilar, oddiy va kechiktirib bo‘lmaydigan chaqiriq bilan birlashamiz: G‘azodagi urush darhol to‘xtatilishi lozim”, deya ta’kidlanadi qo‘shma bayonotda.
“Isroil hukumati qo‘llayotgan insonparvarlik yordamini yetkazib berish usuli xavfli, beqarorlikni kuchaytiradi va G‘azo aholisini insoniy qadr-qimmatdan mahrum etadi. Biz Isroil hukumatini gumanitar yordam yetkazishga qo‘yilgan cheklovlarni zudlik bilan bekor qilishga hamda BMT va gumanitar nohukumat tashkilotlariga o‘z qutqaruv ishlarini xavfsiz va samarali tarzda amalga oshirish imkoniyatini tezda ta’minlashga chaqiramiz”, deyiladi bayonotda.
Murojaat mualliflari Iordan daryosining G‘arbiy qirg‘og‘idagi Isroil fuqaro ma’muriyatining Quddus va G‘arbiy qirg‘oqdagi yirik Maale-Adumim aholi punkti o‘rtasidagi E1 (East 1) nomli hududda yangi aholi punkti barpo etish rejalarini qoralagan.
“Agar bu reja amalga oshirilsa, u Falastin davlatini ikki qismga bo‘lib tashlaydi. Bu esa xalqaro huquqning ochiq buzilishi bo‘lib, ikki davlat asosidagi yechim istiqbollariga jiddiy putur yetkazadi”, deyiladi hujjatda.
Shuningdek, murojaat matnida tomonlar ham, xalqaro hamjamiyat ham “bu dahshatli mojaroni darhol, so‘zsiz va doimiy ravishda o‘t ochishni to‘xtatishga erishish orqali yakunlash uchun birgalikdagi sa’y-harakatlarda birlashish”ga chaqirilgan, hamda AQSH, Qatar va Misrning bu yo‘nalishdagi sa’y-harakatlari qo‘llab-quvvatlangan.
Hujjatni Avstraliya, Avstriya, Belgiya, Buyuk Britaniya, Daniya, Ispaniya, Islandiya, Irlandiya, Italiya, Kanada, Latviya, Litva, Lyuksemburg, Niderlandiya, Yangi Zelandiya, Norvegiya, Polsha, Portugaliya, Sloveniya, Finlyandiya, Fransiya, Shveysariya, Shvetsiya, Estoniya va Yaponiya tashqi ishlar vazirlari, shuningdek, yuqorida tilga olingan Yevropa Ittifoqi komissari imzolagan.
Izoh (0)