Ukraina Xavfsizlik xizmati tintuv paytida Korrupsiyaga qarshi kurashish milliy byurosi (KQKB) mintaqalararo boshqarmalari rahbarlaridan biri Ruslan Magamedrasulovni hibsga oldi. Bu haqda idoraning Telegram kanalida xabar berildi.
Ma’lumotlarga ko‘ra, u Rossiya hududida biznes yuritganlikda gumon qilinmoqda.
“Dnepropetrovskda joylashgan ushbu amaldor Ukrainaning front oldi viloyatlarida byuro faoliyatini muvofiqlashtirgan, shu bilan birga, Rossiya vakillari bilan aloqaga ega va tadbirkor otasiga Rossiya Federatsiyasi bilan noqonuniy savdo qilishda ko‘maklashgan”, deyiladi xabarda.
Ta’kidlanishicha, gumonlanuvchining otasi Rossiya fuqarosi, biroq amaldor KQKBga ishga kirayotganda bu ma’lumotni yashirgan. Xavfsizlik xizmatining qo‘shimcha qilishicha, Magamedrasulovning onasi Kiyevda yashasa-da, “Donetsk Xalq Respublikasi”da nafaqa oladi va Rossiya tomonini qo‘llab-quvvatlaydi.
Unga nisbatan Rossiya maxsus xizmatlari bilan aloqada bo‘lganlik va ularga maxfiy ma’lumotlarni uzatganlik ayblari qo‘yilmoqda. Hozirda tergov harakatlari olib etmoqda.
Xizmat ma’lumotlariga ko‘ra, Magamedrasulov taqiqlangan rossiyaparast OPZJ (“Muxolifat platformasi — hayot uchun”) partiyasidan Oliy Rada deputati Fedor Xristenko bilan ham aloqador. Xristenko davlatga xiyonatda, xususan, u Rossiya Federal xavfsizlik xizmati rezidenti va “Ukraina Milliy korrupsiyaga qarshi kurash byurosiga Rossiya ta’sirini kuchaytirish uchun javobgar bo‘lganlik”da ayblanmoqda.
Qayd etilishicha, Xristenko urush boshlanganidan so‘ng “Ukrainadan chet elga qochib ketgan va Byuroga ta’sir o‘tkazishni davom ettirmoqda”.
“Magamedrasulov Rossiya maxsus xizmatlari bilan aloqador bo‘lgan va tergov aniqlaganidek, KQKB faoliyatiga sezilarli ta’sir ko‘rsatadigan, taqiqlangan OPZJ partiyasidan qochgan xalq deputati Fedor Xristenko bilan yaqin aloqada bo‘lgan”, deyiladi Ukraina xavfsizlik xizmati bayonotida.
Izoh (0)