Koreya Respublikasi Mudofaa vazirligi o‘tgan yili Shimoliy Koreyaga harbiy dronlarni noqonuniy jo‘natishda gumon qilingan uchuvchisiz uchish apparatlari operatsiyalari qo‘mondonligi boshlig‘i general-mayor Kim Yon Deni lavozimidan chetlashtirdi. Bu haqda harbiy idora xabar berdi.
Ma’lum qilinishicha, ushbu qadam sobiq prezident Yun Sok Yolning ikki koreys davlati o‘rtasida keskinlikni keltirib chiqarish va Janubiy Koreyada harbiy holat joriy etish rejasining bir qismi bo‘lgan.
Kim Yon Deni sobiq prezident Yun Sok Yol ishini tergov qilayotgan maxsus prokuror general-mayorni qamoqqa olish uchun order so‘raganidan bir kun o‘tgach ishdan chetlashtirildi. Shu bilan birga, Seul markaziy okrug sudi qamoqqa olish orderini berish to‘g‘risidagi iltimosnomani rad etib, bu gumonlanuvchining himoyalanish huquqini haddan tashqari cheklashini ta’kidlagan.
Ta’kidlanishicha, Yun Sok Yol 2024-yil oktyabr oyida Shimoliy Koreyaning harbiy javobini chaqirish va shu orqali harbiy holat joriy etilishini oqlash maqsadida uchuvchisiz uchish apparatlari qo‘mondonligiga to‘g‘ridan-to‘g‘ri buyruq bergan. Mudofaa vazirligi va Shtab boshliqlari qo‘mitasi bu haqda go‘yo xabardor qilinmagan.
Kim Yon De bu hodisaga aloqadorligini qat’iyan inkor etib, dronlarni jo‘natish Shimoliy Koreyaning Janubiy Koreyaga havo sharlarini uchirish kampaniyasiga qarshi kurash doirasida Shtab boshliqlari qo‘mitasi buyrug‘i bilan qonuniy ravishda amalga oshirilganini ta’kidlamoqda.
Izoh (0)