Namanganda tadbirkorlarga nisbatan 17 ta holatda noqonuniy tekshiruv o‘tkazilganligi aniqlandi

Biznes-ombudsman devoniga 2024-yilning 11 oyi davomida namanganlik tadbirkorlardan 300 ga yaqin murojaat kelib tushgan. Bu haqda viloyatda o‘tkazilgan press-tur davomida maʼlum qilindi, deya xabar beradi “Daryo” muxbiri Azizbek Abduvaliyev.

Ushbu murojaatlar yuzasidan tadbirkorlarning huquqlarini himoya qilish bo‘yicha 150 ta taʼsir chorasi qo‘llangan. Tekshiruvlar qonuniyligi yuzasidan o‘tkazilgan monitoring doirasida nazorat organlari tomonidan 17 ta noqonuniy tekshiruv o‘tkazilganligi hamda 100 dan ortiq holatda tekshirishlar tartibi buzilganligi aniqlangan.

Qon tahlillari asosida turli kasallikllarni aniqlaydigan ekspress testlar yaqingacha mamlakatga chetdan olib kelingan. Biznes-ombudsman ko‘magi bilan mazkur loyiha Namanganda yo‘lga qo‘yilib, hozirda ushbu tibbiyot mahsulotlari viloyatda ishlab chiqarilmoqda. “Nam biotest” korxonasi joriy yili ekspress testlar yetkazib berish bo‘yicha 20 milliard so‘mlik shartnoma imzoladi. Shuningdek, ularni qo‘shni davlatlar va Rossiyada ro‘yxatdan o‘tkazish bo‘yicha dastlabki qadamlar qo‘yildi.

Zargarlik o‘quv yurti va mahalliy zargarlar kooperatsiyasini tashkil etish uchun viloyatdagi texnikumlardan birining bino-inshootlaridan foydalanish yuzasidan taklif kiritilishi natijasida mazkur ko‘chmas mulk Namanganda ushbu yo‘nalishdagi yirik korxonalardan biri — “Gavhar” kompaniyaga berildi. Zargarlik buyumlari va esdalik sovg‘alari ishlab chiqarayotgan korxonada shu nom ostidagi brend yaratilib, Italiya, Turkiya va Germaniyaning zamonaviy texnologiyalari qo‘llanmoqda.

Namanganda faoliyat yuritayotgan “Lactalis agro” xorijiy korxonasi hududi yaqinidan o‘tgan avtomagistral qurilishi jarayonida yuqori kuchlanishli elektr liniyasi zarar ko‘rganligi sababli korxona faoliyati maʼlum vaqt to‘xtab qolgan va mahsulotlarni saqlash muammoga aylangandi. Biznes-ombudsman sayʼ-harakatlari bilan yo‘l qismi qayta qurilishi taʼminlandi va yuqori kuchlanishli elektr taʼminotidagi uzilishga barham berildi. Shuningdek, nazorat qiluvchi organlar tomonidan o‘tkazilgan tekshiruv davomida korxona hisob raqamiga qo‘yilgan cheklov tufayli korxona 1,6 milliard so‘m zarar ko‘rish arafasida bo‘lgan. Biznes-ombudsman aralashuvi bilan korxona hisob raqamiga qo‘yilgan taqiq olib tashlandi va ishlab chiqarish jarayoni davom ettirildi.

Biznes-ombudsman matbuot xizmati tomonidan tashkillangan press-tur davomida jurnalistlar yuqoridagi korxonalarda bo‘lib, ularning faoliyati bilan tanishish va savollariga javob olish imkoniyatiga ega bo‘ldi.