Latviyaga ishlash maqsadida borib, og‘ir kasallikka chalingan o‘zbekistonlik fuqaro O‘zbekiston elchixonasi xodimlari ko‘magida oilasi bag‘riga qaytarildi. Bu haqda “Dunyo” xabar berdi.
Xabarda keltirilishicha, o‘zbekistonlik M.V. o‘tgan yili ishlash maqsadida Riga shahriga kelgan. Ammo sog‘lig‘ida kuzatilgan muammolar sababli shu yil yanvar oyi o‘rtalarida Riga shahridagi shifoxonalardan biriga davolanish maqsadida joylashtirilgan. Qiyin hayotiy vaziyatga tushib qolgan fuqaro O‘zbekiston elchixonasiga murojaat qilib, vatanga qaytish va shifoxona bilan yuzaga kelgan muammolarni hal etishda amaliy yordam berishni so‘rab murojaat qildi.
Diplomatlar shifoxona masʼullari bilan uchrashuv o‘tkazib, barcha muammolarni hal etish bo‘yicha kelishib oldi. Shuningdek, fuqaroning O‘zbekistonga qaytishi bilan bog‘liq hujjatlarni rasmiylashtirishda amaliy yordam ko‘rsatildi.
Bemorning davolanishi va vatanga qaytishi bilan bog‘liq xarajatlar mamlakat elchixonasi hamda Xalqaro migratsiya tashkiloti Riga ofisi ko‘magida ijobiy hal etildi. Fuqaro Uzbekistan Airways milliy aviakompaniyasining Riga—Toshkent yo‘nalishidagi samolyoti bilan O‘zbekistonga kuzatib qo‘yildi.
Bundan avval O‘zbekistonning Qozon shahridagi Bosh konsulxonasi uzoq vaqt davom etgan tadbirlar natijasida Rossiyaning Volgabo‘yi federal okrugidagi Mordoviya jazoni ijro etish muassasasida jazo o‘tayotgan O‘zbekiston fuqarolarining voyaga yetmagan bolalarini vatanga qaytarish jarayonlarini muvaffaqiyatli yakunlagan edi.
Shuningdek, Xitoyda vaqtincha istiqomat qilishi davomida murakkab hayotiy vaziyatga tushib qolgan 11 nafar o‘zbekistonlik xotin-qiz vatanga qaytarilgandi.
Xorijdan O‘zbekistonga qaytarilgan bolalar
Avgust—sentyabr oylarida xorijda ota-ona qaramog‘idan mahrum bo‘lgan 34 nafar bola O‘zbekistonga qaytarilgandi. Oktyabr oyida Rossiyada qarovsiz qolgan 8 oylik chaqaloq O‘zbekistonga, ota-onasi bag‘riga qaytarildi. Moskvadagi voyaga yetmagan huquqbuzarlarni vaqtincha saqlash markazidan 4 nafar bola O‘zbekistonga olib kelindi. O‘sha oyda Turkiyada ota-onasining qarovisiz qolib ketgan uch nafar voyaga yetmagan bola O‘zbekistonga qaytarildi. Noyabrda Dubayni tark etish taqiqlangan o‘zbekistonlik bolaga vatanga qaytishiga yordam berildi. Dekabrda Rossiyada ota-ona qaramog‘isiz qolgan 15 nafar bola O‘zbekistonga qaytarildi.
Izoh (0)