Prezident maktabi o‘quvchisi dunyo bo‘yicha 14-o‘rinda turadigan Chikago universitetiga 100 foizlik grant asosida qabul qilindi. Bu haqda maktabgacha va maktab ta’limi vaziri Hilola Umarova ma’lum qildi.
Keltirilishicha, Guliston shahridagi Prezident maktabining 11-sinf o‘quvchisi Asilbek Ashurov Amerikaning nufuzli Chikago universitetiga 420 000 AQSH dollar miqdoridagi to‘liq grant asosida o‘qishga qabul qilindi.
U Chikago universitetining to‘liq grantini qo‘lga kiritgan ilk o‘zbekistonlik o‘quvchi. Chikago universiteti dunyodagi eng nufuzli oliygohlardan biri bo‘lib, xalqaro miqyosda o‘zining ilmiy tadqiqotlari, yuqori sifatli taʼlimi va kuchli akademik anʼanalari bilan tanilgan.
QS World University Rankings va Times Higher Education kabi xalqaro reytinglarda Chikago universiteti doimiy ravishda eng yuqori o‘rinlarni egallab keladi. Hozirda ushbu universitet dunyo miqyosida 14-o‘rinda turadi.
Shu kabi natijalarga erishgan o‘quvchilar:
O‘tgan yillar davomida Toshkent shahridagi Prezident maktabi o‘quvchisi Abdulaziz Sobirov dunyo reytingida Top 5 likka kiruvchi Garvard universitetiga 354 000 AQSH dollari miqdoridagi grant bilan o‘qishga qabul qilingan.
Maktabning yana bir bitiruvchisi Sayfullo Saidov dunyo reytingida 9-o‘rinda turuvchi University College London oliygohiga, shuningdek, dunyo QS reytingida 17-o‘rinda turadigan Prinston universitetiga 350 000 AQSH dollari miqdoridagi to‘liq grant asosida muddatidan oldin o‘qishga qabul qilingan.
Namangan Prezident maktabining bitiruvchisi Go‘zal Haydarova hozirda Garvard universitetida to‘liq grant asosida taʼlim olmoqda. Ushbu nufuzli universitetlar bitiruvchilari orasida taniqli olimlar, Nobel mukofoti sovrindorlari ko‘pchilikni tashkil qiladi.
Avvalroq xorijda o‘qigan o‘zbekistonlik talabalar vatanga qaytganida muvaffaqiyatli karyera qilishiga yordam berilishi aytilgandi. Hozirgi vaqtda dunyodagi top-oliygohlarda 1,5 mingdan ziyod o‘zbekistonlik talaba tahsil olmoqda. Prezident buni O‘zbekiston uchun tarixda kuzatilmagan voqelik deb atadi.
Izoh (0)