Ijtimoiy tarmoqda Toshkentning Mirzo Ulug‘bek tumanidagi metro bekati yaqinida yirtqich qush hisoblangan kalxat uchib yurgani aks etgan video tarqaldi. Holat bo‘yicha Toshkent hayvonot bog‘i maʼlumot berdi.
Maʼlum qilinishicha, Go‘sha laqabli kalxat hayvonot bog‘iga qaytarilgan.
Bizning Grif Go‘sha kichik sarguzashtga otlangan ko‘rinadi! U bir necha kun shaharni o‘rgandi, lekin oxir-oqibat o‘z uyidan yaxshi joy yo‘qligini tushundi, deyiladi hayvonot bog‘i xabarida.
Qayd etilishicha, Toshkent hayvonot bog‘i va Ekologiya vazirligi xodimlari uning harakatlarini diqqat bilan kuzatib borgan va kerakli paytda unga uyga qaytishga yordam bergan.
“Go‘sha qanotlari katta bo‘lsa-da, u hayvonot bog‘ida o‘sgan va yovvoyi tabiatda yashashga moslashmagan. Bu yerda unga kerak bo‘lgan hamma narsa bor: mutaxassislar g‘amxo‘rligi, to‘g‘ri tanlangan ovqatlar va o‘zini qulay his qiladigan sharoit.
Endi Go‘sha yana uyida – hordiq chiqarib, to‘yib ovqatlanib, qaytganidan mamnun ko‘rinadi, deya qo‘shimcha qilinadi xabarda.
Bundan avval Xorazm viloyatining Urganch shahrida noqonuniy saqlanayotgan sher hayvonot bog‘iga topshirilgan edi. Shuningdek, Toshkent shahar Olmazor tumanida fuqaro o‘z uyida Qizil kitobga kiritilgan qushlarni saqlab kelayotgani aniqlangandi.
Izoh (0)