Toshkent hayvonot bog‘ida 2022-yilning yanvar oyida uch yoshli qizaloq onasi tomonidan ayiq qafasiga tashlangan, qizcha baxtli tasodif sabab yirtqichdan zarar ko‘rmay qolgan. Qizaloqning onasi 1991-yilda tug‘ilgan Zilola To‘laganova Toshkentdagi oliy o‘quv yurtlaridan birida o‘qituvchi bo‘lib ishlashi, turmush o‘rtog‘i Rossiyaga ketgani va ular birga yashamayotgani aytilgan. Ayol ruhiy asab kasalliklari dispanserida ro‘yxatda turishi ma’lum bo‘lgan. Sud ajrimi bilan ona ijtimoiy xavfli xatti-harakatini aqli noraso holatda sodir etgan, deb topilib, uning Respublika kuzatuvi kuchaytirilgan ruhiy kasalliklari shifoxonasida majburiy davolanishi belgilangan.
Bugun, 13-dekabr kuni Toshkent shahrida Zilola To‘laganovaning “Meni eshiting” nomli ko‘rgazmasi tashkil etilgan. Bu haqda “Milliy tiklanish” demokratik partiyasi axborot xizmati xabar bermoqda.
Ko‘rgazmada Zilola To‘laganovaning turli yillarda chizgan 30 dan ziyod ijodiy ishlari, u badiiy muharrirlik qilgan 100 dan ortiq kitoblar, hayoti va ijodiga oid fotosuratlar hamda ayni paytda shifoxonada yaratgan asarlari namoyish etilgan.
Partiya markaziy kengash raisi o‘rinbosari Feruza Muhammadjonovaning aytishicha, ko‘rgazmani tashkil etishdan ko‘zlangan asosiy maqsad ayni paytda og‘ir ruhiy holatni boshidan kechirayotgan rassom ayolni qo‘llab-quvvatlash, ijodini keng targ‘ib qilish, iqtidorini yuzaga chiqarish, taniqli san’atshunoslar, rassomlar, noshirlar, psixologlar fikrlari asosida Zilola To‘laganova haqida ijobiy fikr uyg‘otishdir.
“Bunday fojiali holatlarning oldini olish uchun ularning oqibatlari bilan emas, insonni o‘zini boshqara olmaydigan holatga olib kelgan sabablar bilan kurashish muhim ekanini yana bir bor jamoatchilikka anglatmoqchimiz”, – dedi Feruza Muhammadjonova.
Nima bo‘lgan edi?
28-yanvar kuni soat 12:00 larda yosh ayol noma’lum sabablarga ko‘ra odamlarning ko‘z oldida kichkina qizaloqni ayiq qafasiga tashlab yuborgan.
“Zuzu laqabli Kavkaz qo‘ng‘ir ayig‘i o‘z volyerida yotib olib, qizaloqni metall to‘siq ustidan otib yuborgan ayol harakatlarini kuzatdi. Mehmonlarimiz va xodimlarimizning urinishlariga qaramasdan, ayolni to‘xtatib qolishning imkoni bo‘lmadi. U bolani yirtqichning qafasiga otib yubordi. Zuzu ayig‘imiz sekingina zovurga tushib, qizaloqni hidlab ko‘rdi va undan uzoqlashdi”, — deyiladi xabarda.
Holat o‘rganilib, kichkina qizaloqni ayiq volyeriga tashlab yuborgan ayolga nisbatan jinoyat ishi qo‘zg‘atildi.
Keyinroq SSV yirtqich qafasiga tashlab yuborilgan qizchaning ahvoli to‘g‘risida ma’lumot berdi. Unda aytilishicha, 2018-yilda tug‘ilgan qizchaga dastlab hayvonot bog‘i hamshirasi birinchi yordam ko‘rsatgan. Shundan so‘ng u tez yordam mashinasida soat 13:30 larda Respublika shoshilinch tibbiy yordam ilmiy markaziga olib kelingan. Qizcha shifoxonada barcha zarur tibbiy ko‘riklardan zudlik bilan o‘tkazilgan.
“U yengil shok holatida bo‘lgan, balandlikdan yiqilish oqibatida ochiq bosh miya jarohati va bosh miya chayqalishi kuzatilgan. Hozirda uning ahvoli yaxshi, tibbiyot xodimlari nazoratida”, — deyiladi xabarda.
Toshkent hayvonot bog‘i Yirtqichlar bo‘limi mudiri Nodir Bahromov bog‘da 28-yanvar kuni sodir bo‘lgan voqea yuzasidan “Daryo”ga qo‘shimcha ma’lumotlar taqdim etdi. Xodimning ta’kidlashicha, bu holat bog‘ tarixidagi birinchisi.
“O‘zi erkak ayiq bu. Aslida erkak ayiq hatto o‘zining bolalari uchraganda yeb qo‘yib, o‘ldiradigan darajada bo‘ladi. Lekin Allohning marhamati deymizmi, hatto boshi qonagan holatda ham ayiq qizchaga tegmadi. Bu yerdagi xodimlar tez non va shunga o‘xshash yeguliklar bilan ayiqni chalg‘itib, uzoqlashtirdi”, — deydi Nodir Bahromov.
Mahalla va oilani qo‘llab-quvvatlash vazirligi qizini ayiq qafasiga tashlab yuborgan ayol haqida ma’lumot berdi. O‘rganishlar davomida hodisa ishtirokchilari 1991-yilda tug‘ilgan fuqaro Z.T. va uning 2018-yilda tug‘ilgan qizi Z.A. ekani aniqlangan. Z.T. ismli ayol hozirga qadar o‘z otasi, fuqaro Y.T.ga tegishli xonadonda 2 nafar farzandi bilan yashab kelgan. Ayol bilan suhbat davomida uning Toshkentdagi oliy o‘quv yurtlaridan birida o‘qituvchi bo‘lib ishlashi, ayni vaqtda Rossiya davlatiga ketgan turmush o‘rtog‘i N.K. bilan hozirda birga yashamayotgani sababli ruhiy tushkunlikka tushib qolgani ma’lum bo‘lgan.
Ijtimoiy tarmoqlarda esa Toshkent hayvonot bog‘ida ayol kichkina qizaloqni ayiq qafasiga tashlab yuborgani aks etgan videolavha tarqaldi.
Keyinchalik ayiq qafasidan olib chiqilgan qizaloq 18 yoshga to‘lguncha Bolalar milliy tibbiyot markazining doimiy nazoratida bo‘lishi xabar qilindi. Ayiq qafasidan omon qolgan qiz shifoxonadan uyiga qaytgan.
Izoh (0)