Shotlandiya Edinburg hayvonot bog‘ida 12 yil yashagan ikki pandani Xitoyga qaytarib yubordi. Ular Buyuk Britaniyada mavjud yagona pandalar edi. Bu haqda AP xabar bermoqda.
Pandalar 2011-yilda xalqaro ijara doirasida Buyuk Britaniyaga ko‘chirilgan.
Pandalarni tabiiy yo‘l bilan ham, sun’iy usul bilan ham ko‘paytirishga urinishlar muvaffaqiyatsizlikka uchraganidan so‘ng, hayvonot bog‘i ma’murlari ushbu urinishlarni davom ettirishni rejalashtirmayotgani, buning o‘rniga yo‘qolib borayotgan turlarni himoya qilishga e’tibor qaratishini aytdi.
“Yo‘q bo‘lib ketish xavfi ostida turgan milliondan ortiq turlar bor, tabiiy dunyomiz esa inqirozga yuz tutib turibdi, Yang Guag va Tyan Tyan (Xitoy pandalarining laqabi —“Daryo” izohi) millionlab odamlarni tabiatga g‘amxo'rlik qilishga ilhomlantirishga ajoyib hissa qo‘shdi”, — dedi Shotlandiya zoologiya jamiyati bosh direktori Devid Fild.
Katta panda Xitoyning norasmiy ramzi hisoblanadi. Xorijiy davlatlar Xitoydan pandalarni o‘n yil muddatga ijaraga olishi mumkin. Xitoy diplomatik aloqalarni o‘rnatish uchun ushbu vositadan foydalanadi. Ijara muddati tugagach, agar shartnoma uzaytirilmasa, hayvonlar Xitoyga qaytarilishi kerak.
Bir juft panda uchun Pekinga 250 ming dollardan bir million dollargacha haq to‘lanadi. Xitoy tomonidan xorijiy davlatlar bilan munosabatlar o‘rnatishda qo‘llanadigan xalq diplomatiyasining bunday usuli panda diplomatiyasi deb ataladi.
Avvalroq AQSH Vashington hayvonot bog‘idagi pandalar yil oxirida Xitoyga qaytarib yuborilishi mumkinligini ma’lum qilgandi.
Izoh (0)