Yunusobod Business City hududidan 3,2 gektar yer maydoni onlayn auksionga qo‘yildi

6-may kuni Toshkent shahrida yirik sarmoyaviy loyiha — Yunusobod Business City taqdimoti bo‘lib o‘tdi. Tadbirda shahar hokimligi vakillari, tadbirkorlar va investorlar ishtirok etdi.

Taqdimotda Toshkent shahar hokimi o‘rinbosari Sharof Rahmanovning aytishicha, Yunusobod Business City prezident qarori asosida amalga oshirilmoqda. Uning umumiy maydoni 44,5 gektarni tashkil etadi.

“Loyiha doirasida salkam 20 gektar maydonda istirohat bog‘lari, piyoda va avtomobil yo‘llari quriladi. Qolgan yer maydonlari lotlarga ajratilgan holda invetorlarga taqdim etilmoqda. Loyihalarning umumiy qiymati 763 million dollarni tashkil etadi”, — dedi hokim o‘rinbosari.

Taqdimotda Yunusobod Business City direksiyasi rahbari Nizomiddin Pardayev nutq so‘zlab, ko‘p qavatli uylar va tijorat ofislari qurish uchun loyiha hududidan 3,2 gektar yer maydoni auksionga qo‘yilganini aytdi.

“Jami 16 ta lot e–auksion.uz platformasiga joylashtirildi. Har bir lot 16 sotixdan 23 sotixgacha. Bunda turar joy binolarini 16 qavatgacha qurish imkoni mavjud va ularning 1–2 qavatlari tijorat maydonlari bo‘ladi. Invetorlarga yer pulini 12 oy davomida bo‘lib to‘lash imkoniyati ham yaratildi.

Shuningdek, infratuzilma tarmoqlari, yaʼni elektr energiyasi, gaz, kanalizatsiya, ichki yo‘llar va yashil zonalar direksiya mablag‘lari hisobidan tashkil etiladi. Direksiya loyihani investorga hujjatlardan tortib to qurilishni yakunlaguncha bo‘lgan jarayonda ko‘mak beradi. Biz hokimiyat va investor o‘rtasidagi ko‘prik vazifasini bajaramiz”, — dedi direksiya rahbari.

Yunusobod Business City Toshkent botanika bog‘i, hayvonot bog‘i, istirohat bog‘lari, savdo markazlari hamda boshqa muhim ijtimoiy obyektlar yaqinida joylashadi.

Majmuada besh yulduzli mehmonxonalar, biznes markazlari, ko‘p qavatli turar joy majmualari va boshqa qator yirik obyektlar qurilmoqda.

Tadbirkor va investorlar Yunusobod Business City hududidan sotuvga qo‘yilgan 16 ta yer uchastkasini E-auksion.uz elektron savdo platformasi orqali xarid qilishlari mumkin. Loyihaning o‘ziga xos xususiyatlaridan biri uzbekistan 360.uz veb-saytida virtual sayohat orqali Yunusobod Business City va uning obyektlariga onlayn tashrif buyurish imkoniyati mavjud.

Yunusobod Business City nafaqat yangi sarmoyaviy imkoniyat, balki yangi ish o‘rinlari yaratish, turmush sifatini yaxshilash va sarmoyalarni jalb etishga ko‘maklashish vaʼdasi bilan Toshkent shahri rivoji yo‘lidagi oldinga qadamdir.

Loyiha va investitsiya imkoniyatlari haqida batafsil ma’lumot olish uchun (+998) 95−501−70−70 telefon raqamiga murojaat qilish mumkin.

Sayt: yubc.uz
Facebook: fb.com/YunusobodBusinessCity
Instagram: @yunusobod_bc
Telegram: t.me/yubc_uz

Reklama huquqlari asosida.