Toshkent hayvonot bog‘i tashkil qilinganiga I asr to‘lgan bo‘lib, maʼrifiy va ilmiy tadqiqot ishlari olib boradigan muassasa ham hisoblanadi. Jonivorlarning 400 turga yaqini saqlanib, ular orasida jaziramaga moslashganlari ham va aksincha, issiqni uncha yoqtirmaydiganlari ham mavjud.
Hayvonot bog‘i 11 bo‘limdan iborat bo‘lib, yoz mavsumi uchun mo‘ljallangan maxsus tadbirlar haqida Maʼnaviy ishlar bo‘limi xodimi Minavar Tanikulova “Daryo”ga maʼlumot berdi.
Har yilgi yoz mavsumida, quyosh qizdira boshlagach, hayvonlar uchun salqinroq joylar tashkil etiladi, maxsus mikroiqlim yaratiladi. Shunday qilinmasa, jonivorlar o‘zini lohas his qilib, yotib oladi, kamharakat bo‘lib qoladi va tomoshabinlar o‘zlari kutgan zavqni ololmaydi. O‘tgan yili Janubiy Аfrikadan jirafa, zebra, oq sher va oq yo‘lbars xarid qilingan.
Hayvonot bog‘ida qish va yoz mavsumlari uchun alohida tayyorgarlik ko‘riladi. Bog‘ shaharning boshqa joylariga qaraganda ancha salqinroq, sababi bir tarafida Botanika bog‘i, boshqa tomonidan anhor o‘tgan. Qo‘shimcha ravishda jonivorlar uchun yozgi volyerlarda soyabonlar va mikroiqlim yaratuvchi moslamalar o‘rnatilgan. Qish faslida jonivorlar yopiq volyerlarga o‘tkaziladi. Isitish tizimi oktyabr oyidan ishga tushiriladi.
Mutaxassis jonivorlar uchun yozda qanday sharoitlar yaratilgani haqida to‘xtalib o‘tdi.
Har bir qafasda suv havzasi mavjud, suvi tez-tez almashtirib, tozalab turiladi. Qo‘shimcha tarzda jonivorlar uchun salqin xonalar bor, juda isib ketsa, shu xonaga kiradi. Ratsion bo‘yicha vaqtida oziqlantiramiz, ular doim veterinar vrachlar nazoratida, — dedi mutaxassis.
“Bengal sheri ko‘payib, nasl qoldiruvchi jonivor”, — Minavar Tanikulova.
Xalq orasida “Tutqunlikda hayvonlar ko‘paymaydi” degan qarash bor. Аsosiy maqsadimizdan biri — “Qizil kitob”ga kiritilgan jonivorlarning sonini ko‘paytirib, nasl qoldirishini taʼminlash. Bog‘da bir juft Bengal sheri yashaydi, bu jonivorlar ham ko‘payib, nasl qoldiradi.
Hayvonat bog‘idagi yo‘lbars Rossiyadan olib kelingani haqida ma’lumot berildi.
Rossiyadan olib kelingan Аmur yo‘lbarsining laqabi ‘‘Navro‘z”. Toshkentga Navro‘z kunida kirib kelgani uchun unga shu nom berilgan. Juftini esa “Osiyo” deb chaqiramiz.
Hayvonlarning tug‘ilgan kuni va bayram sanalariga bag‘ishlangan shou-dasturlari va bayram “sohiblari” uchun alohida taom tayyorlanishi haqida mutaxassis qiziqarli ma’lumot berib o‘tdi.
Hayvonot bog‘ida jonivorlarning tug‘ilgan kunlari nishonlanadi. Filning tug‘ilgan kunida u sevib isteʼmol qiladigan ozuqalariga tort ko‘rinishida shakl berib, “sovg‘a” qildik. Tomoshabinlar qarsaklar bilan uni tabriklashdi. Shu bilan birga, bayramlarda shou-dasturlar uyushtiriladi, bolalar ota-onalari bilan kelib, zavq olib, hordiq chiqarishadi.
Bog‘ xodimasi “Tropik kapalaklar uyi” nega yopilgani sababi haqida aytib o‘tdi.
Bundan 5-6 yil oldin hayvonot bog‘ida ekzotik kapalaklar ko‘rgazmasi tashkil etilgan. “Kapalaklar uyi” deb nomlangan hududda ularning 50 turdan ortig‘i namoyish qilingan. Hozirgacha mehmonlarimiz “Kapalaklar uyi”ni ko‘p so‘rashadi. O‘shanda bo‘lim karantin sababli yopilgan edi. Hozir u yerda “Dinozavrlar bo‘limi” faoliyat yuritmoqda. Bu bo‘limni qaytarish ham rejamizda bor.
“Jonivorlarning ozuqasini o‘lkamizga moslashtiramiz”
Bilamizki, faqat o‘z o‘lkasida o‘sadigan ozuqani yeydigan hayvonlar bor. Eng yoqimtoy panda – bambuk, koala esa evkalipt barglarini yeydi. Bizning mintaqada bu o‘simliklar deyarli uchramaydi. Bunday jonivorlar o‘lkamizga moslashtiriladi. Аvvaliga ularni o‘zlari o‘rgangan ozuqa bilan boqamiz, asta-sekin ratsioniga o‘zimizning mintaqa o‘simliklarini qo‘shamiz. Va ular tezda moslashib, yeguliklarni ishtaha bilan isteʼmol qila boshlaydi.
Hozirgi kunda Toshkent hayvonot bog‘ida Arangutan maymuni, Qamish mushugi, Amur va Bengal yo‘lbarslari, kenguru kabi noyob hayvonlar saqlanadi. Ular uchun iqlimga mos sharoitlar yaratiladi. Jonivorlar bog‘ veterinar vrachlari tomonidan emlanib, turli kasalliklardan himoyalanadi. Shuningdek, sanitariya kunida hayvonlar cho‘miltirilib, qafaslari va oziqlanadigan idishlari tozalanadi.
Izoh (0)