Asrlar davomida qirollik xonadoni a’zolari farzandlarini qattiqqo‘llik bilan tarbiyalagan va ularning har biri bola tarbiyasida qirollik protokoliga rioya qilish qanchalik qiyinligini biladi. Biroq ko‘pchilik an’analar va onalik instinktlariga rioya qilish o‘rtasidagi muvozanatni topib, o‘z avlodlariga baxtli bolalikni beroldi.
Malika Diana
Ko‘p asrlar davomida aristokratik doiralarda enagalar odatiy hol hisoblangan va ular qirollik merosxo‘rlarini tarbiyalashda ishtirok etgan, shu bilan birga bolaning shaxsiy ehtiyojlariga e’tibor bermaslik odat tusiga kirgan. Yaxshi ona o‘g‘illarini hukmdor bo‘lishga o‘rgatishi va qizlarini ideal kelin qilib tarbiyalashi kerak, deb ishonilgan. Ammo bularning barchasi malika Dianaga umuman qiziq emasdi.
Turmushga chiqishidan oldin Di xonim bolalar bog‘chasida ishlagan. U hamma narsadan ko‘ra o‘g‘illariga baxtli bolalikni berishni xohlardi. Uels malikasi Uilyam va Garriga zavq beruvchi har qanday ko‘ngilochar o‘yinlarga ruxsat beradi. Kichkina shahzodalar bilan yashirincha kino va parklarga borib, qirollik odatlarini buzadi.
Bir kuni Uels malikasi “Onalar poygasi”da qatnashadi, boshqa onalar bilan raqobatlashishdan uyalmaydi. Umuman olganda, uning kundalik tartibi o‘g‘illariga imkon qadar oddiy bolalikni berishdan iborat edi. Dugonasi Lana Marks shunday deydi: “U bolalari maktabdan qaytganda hamma narsani tashlardi. Uning uchun biron bir davlat rahbari bilan uchrashuv yoki tantanali tadbirda ishtirok etish muhim emasdi — bular u uchun ikkinchi darajali edi”.
Malika Keyt
Shahzoda Jorj tug‘ilgandan so‘ng, Keyt Britaniya taxtining bo‘lajak merosxo‘rini begona ko‘zlardan uzoqqa — ota-onasining Berkshirdagi uyiga olib ketadi. Bugungi kunda XIX asrning boshida qurilgan Norfolkdagi Anmer Holl mulkida uning uch farzandi uchun ajoyib makon yaratilgan. Bu yer Sharlotta, Jorj va Lui uchun hayvonot bog‘i, ajoyib tabiiy tarix muzeyi va hatto ular yangi kiyim uchun borishi mumkin bo‘lgan oddiy supermarketlarni o‘z ichiga oladi.
Kembrij vorislarini tarbiyalashda mehr-oqibat, odamlarga hurmat va ogohlik hamma narsadan ustun turadi. “Menimcha, bu narsalar matematika yoki sport kabi muhim”, — deydi malika Keyt. Perfeksionizmni rad etib, u oddiy hayotning kichik zavqlariga e’tibor qaratadi. Ketrin bolalarining tug‘ilgan kuni arafasida piyoda yurish, birga pitssa pishirish, futbol tomosha qilish va tug‘ilgan kun tortini tayyorlashni o‘z ichiga olgan oilaviy odatlarni yaxshi ko‘radi.
Knyaginya Sharlin
Knyaginya Sharlin turmush o‘rtog‘i Albert bilan farzandlari — malika Gabriella va shahzoda Jakni shahar tashqarisidagi qasrda, tabiat qurshovida tarbiyalaydi. Sharlin Zimbabveda tug‘ilgan va tabiatga yaqin bo‘lishga o‘rganib qolgan, shuning uchun u bolalari uy hayvonlari bilan yotoqlarida uxlab qolishlariga qarshi emas. “Bolalar kim men bilan uxlashi haqida janjal qilishadi — deydi u. — Ular bizning karavotimizda yotishni yaxshi ko‘radi”.
Malika Viktoriya
Shvetsiya valiahd malikasi farzandlariga ularni sevishlarini ko‘rsatish orqali ularga ishonch beradi. Viktoriya va eri Danielning farzandlari ota-onalari bilan ko‘p vaqt o‘tkazadi: ular bolalari bilan birga ovqat pishiradi, uy vazifalarini bajarishda ularga yordam beradi va oddiy ona-ota qilishi kerak bo‘lgan hamma narsani qilishadi. Malikaning fikricha, Estelle va Oskar shved fuqarolari kabi oddiy bolalikni o‘tkazishi kerak.
Qirolicha Yelizaveta II
Yelizaveta II taxtga 25 yoshida o‘tiradi va katta farzandlari shahzoda Charlz va malika Anna bilan ko‘p vaqt o‘tkaza olmaydi. Afsuski, bu uning uch o‘g‘li va qizi o‘rtasidagi munosabatlarga qisman ta’sir qiladi. Biroq ularning har biri baxtli bolalikni o‘tkazadi. Ayniqsa, bayram kunlari qirolicha, eri va bolalari uchun baxtli damlarga aylanadi.
Vindzor oilasi arxivlarida qirolicha va shahzoda Filipp Balmoral qasridagi maysazorda farzandlari bilan o‘ynayotgan tasvirlar mavjud. Fotolardan birida malika Anna plyajdagi qumga bo‘yniga qadar ko‘milganini ko‘rish mumkin. Boshqasida monarxning bolalari velosipedda suratga tushgan — shahzoda Filipp ularga qirollik yaxtasi Britannia’dagi kema tepaligidan pastga tushishga yordam beradi. Qirolichaning jiyani Sara Chatto xonim: “Biz dunyo shovqin-suronlaridan shunchalik uzoqda edikki, bu haqiqatan ham ajoyib damlar edi”, — deb eslaydi.
Izoh (0)