Dubay – Birlashgan Arab Amirliklaridagi kishini hayratga soluvchi megapolis, u oilaviy dam olish uchun ideal joy. Bu shahar butun oila uchun aqlni shoshiruvchi mavzuli parklar va akvariumlardan tortib, to o‘ziga maftun etuvchi bog‘lar hamda madaniy tadbirlargacha unutilmas lahzalarni in’om etadi.
Dubai Miracle Garden – dunyodagi eng katta tabiiy gullar bog‘i. Bu yerda ulkan yuraklar shaklidagi bezaklardan tortib, to samolyotlarning modellarigacha – hammasi gullardan yaratilgan. Bolalarga Smurfiklar qishlog‘ida sayr qilish va gullardan yasalgan Disney qasriga chiqish yoqib qolishi shubhasiz, kattalar esa gullardan iborat kompozitsiyalar fonida ko‘plab oilaviy fotosuratlarni olishi mumkin. Joriy mavsumda park yanada qiziqarliroq tus olgan – bu yerda mini-golf uchun maydon ochilgan.
Botanika bog‘i hududida yana bir diqqatga sazovor maskan joylashgan – bu Dubai Butterfly Garden kapalaklar bog‘i, unda kapalaklarning 50 dan ortiq turlari yashaydi.
Dubai Mall savdo markazining qoq markazida joylashgan Dubai Aquarium & Underwater Zoo akvariumi – Dubaydagi eng ommabop joylardan biri.
Akvariumning 48 metrlik shaffof tunneli orqali o‘tar ekansiz, dengiz jonivorlari – akulalar, skatlar va ko‘p sonli baliqlarning hayotiga sho‘ng‘iysiz. Akvariumda 33 mingta dengiz hayvoni yashaydi, dengiz hayvonot bog‘ida esa pingvinlar, timsohlar, dengiz otlari va boshqa jonivorlarni ko‘rish mumkin.
Bolalar uchun maxsus dasturlar va o‘yin zonalari ko‘zda tutilgan. Ular baliqlarga yemish tashlashi, dengiz yulduzlarini ushlab ko‘rishi, akulalar bilan birga suzishi mumkin. Kun davomida akvariumda turli shou va tomoshalar o‘tkaziladi.
IMG Worlds of Adventure – Dubaydagi eng katta mavzuli yopiq attraksionlar parki va butun oila xursandchilik bilan hordiq chiqarishi uchun ideal maskan. Park oltita zonaga bo‘lingan, unda ko‘plab qiziqarli Amerika “tog‘lari” hamda Cartoon Network’ning mashhur qahramonlari, Marvel superqahramonlari va dinozavrlarga asoslangan attraksionlar mavjud.
Kichik yoshdagi bolalar uchun parkda alohida zona yaratilgan – bu ulkan dam beriladigan IMG Kids Zone o‘yin maydoni.
Kite Beach bepul shahar plyaji ideal sohil chizig‘iga, toza suvga va barcha yoshdagi mehmonlar uchun ko‘plab ko‘ngilocharliklarga ega Dubaydagi eng ommabop plyajlardan biri hisoblanadi. Kite beach – kaytsyorfing ishqibozlarining Makkasi bo‘lib, plyajda yana vindsyorfing, sapsyorfing bilan shug‘ullanish yoki shunchaki suzish yoki toblanish mumkin.
Bu yerda dengizni tomosha qilgan holda tamaddi qilib olish yoki kechqurun ovqatlanish mumkin bo‘lgan ko‘plab qahvaxona va restoranlar bor. Bolalar uchun o‘yin maydonchalari jihozlangan.
Dunyodagi eng baland bino Burj-Halifa etagida joylashgan The Dubai Fountain musiqiy favvorasi Dubayning asosiy diqqatga sazovor joylaridan biri hisoblanadi. Bu yerda mashhur kompozitorlarning musiqasi jo‘rligidagi suv va chiroqlar raqsi hech kimni loqayd qoldirmaydi.
Shou soat 13:00 dan 13:30 gacha (juma kunlari soat 13:30 dan 14:00 gacha) hamda 18:00 dan boshlab 23:00 gacha har yarim soatda o‘tkaziladi. Favvora oldidagi maydonga qulay joyni egallash uchun sal oldinroq kelgan ma’qul.
Shouni an’anaviy arab qayig‘i – abraga chipta sotib olgan holda suvdan turib ham tomosha qilish mumkin. Favvoraga, Burj Khalifa minorasiga qaragan eng yaxshi manzara va eng yorqin taassurotlar bir umr esingizda qoladi.
The Dubai Fountain favvorasi bevosita Dubai Mall savdo markazining yonida joylashgan. Favvoralar shousini shoping qilgan holda va molldagi boshqa diqqatga sazovor joylarni ko‘rgan holda bir vaqtning o‘zida tomosha qilish mumkin.
The Green Planet – bu Dubayning qoq yuragida joylashgan noyob yopiq tropik o‘rmon. U butun bir olam bo‘lib, bu yerda siz turli-tuman tropik fauna va flora turlari bilan tanishishingiz va, hatto, tropik jala yomg‘irini ham ko‘rishingiz mumkin.
Majmuaning markaziy elementi – balandligi 25 metr bo‘lgan ulkan sun’iy daraxt, u minglab o‘simliklar va hayvonlar uchun boshpana vazifasini bajaradi. Green Planet 3000 dan ortiq hayvon turlari, jumladan qushlar, reptiliyalar, hashoratlar va maymunlar, lenivetslar va lemurlar uchun uy hisoblanadi.
Bolalar va kattalar uchun turli ta’lim dasturlari o‘tkaziladi, ularda siz tropik o‘rmonlar va ularda yashaydigan hayvonlar haqida ko‘plab qiziqarli ma’lumotlarni bilib olishingiz mumkin.
Aquaventure Waterpark – dunyodagi eng katta akvapark bo‘lib, bu yerda oilangizning har bir a’zosi o‘ziga yoqadigan ko‘ngilxushlikni topadi. Akvaparkda 105 dan ortiq “tog‘lar” va attraksionlar (shu jumladan dunyodagi eng ekstremal Leap of Faith attraksioni ham), “erinchoq” daryochalar, kichkintoylar va kattaroq yoshdagi bolalar uchun alohida zonalar mavjud. Shuningdek, akvaparkda akulalar bilan birga suzish, dengiz hayvonlarini tomosha qilish va hatto syorfing qilishni o‘rganish ham mumkin. Ushbu hududda jihozlangan katta plyaj hamda qahvaxona va fud-traklar ham faoliyat ko‘rsatadi.
Dubai Parks and Resorts – Dubaydagi ulkan ko‘ngilochar majmua, u bir nechta mavzuli parkni, akvaparkni, mehmonxonalar va ko‘plab restoranlarni o‘zida birlashtirgan.
Motiongate attraksionlar parki Gollivudga bag‘ishlangan. Bu yerda siz DreamWorks multfilmlarining qahramonlarini uchratasiz, Sony Pictures kinostudiyasiga tashrif buyurasiz va Gotem-sitiga tushib qolasiz.
LEGOLAND attraksionlar parki va LEGOLAND Waterpark akvaparki – bu nafaqat ko‘plab “tog‘lar” va attraksionlarga tashrif buyurish, balki dunyodagi eng mashhur konstruktor yordamida o‘z shakllaringizni qurish imkoniyati hamdir.
Real Madrid World – futbol mavzusiga bag‘ishlangan dunyodagi birinchi park. U sizni mashhur futbol klubining tarixiga olib kiradi, bu yerda ko‘plab mavzuli interfaol attraksionlar ham mavjud. Xususan, hududdagi ilk Hala Madrid yog‘och Amerika “tog‘larida” uchishingiz yoki balandligi 140 metr bo‘lgan dunyodagi eng baland Stars Flyer attraksionini zabt etishingiz mumkin.
Tarixiy Al Fahidi Historical District mavzesi – bu eski Dubayning yuragi. Bu yerda arab arxitekturasi va a’anaviy turmush tarzi muhitiga tushib qolasiz. Marjon toshlaridan qurilgan binolar oralab sayr qilishingiz, Dubai Museum va Qahva muzeyiga tashrif buyurishingiz, mahalliy do‘konchalarga kirib, esdalik suvenirlarini xarid qilishingiz mumkin. Shuningdek, eski shaharni tomosha qilgan holda mahalliy o‘ziga xos qahvaxonada yoki restoranda qahva ichishingiz yoki kechki ovqatni tanovul qilishingiz ham mumkin. Agar sayrdan taassurotlarni kuchaytirishni istasangiz, an’anaviy arab qayig‘i – abrada Dubai Creek kanali bo‘ylab aylaning.
Museum of the Future muzeyi Dubayning yangi, biroq mamlakatda va dunyoda taniqli bo‘lishga ulgurgan diqqatga sazovor joylaridan biri hisoblanadi.
Muzey binosi – haqiqiy arxitektura durdonasi. Binoning old qismi arab yozuvlari bilan qoplangan bo‘lib, u tunda yoritiladi va g‘aroyib vizual samarani hosil qiladi. Muzey ichida sizni kelajakka nazar kutadi, ya’ni yangi texnologiyalar, kashfiyotlar va ularning kelajak hayotga ta’siri. Muzey ekspozitsiyasi kattalarga ham, bolalarga ham qiziqarli bo‘lishi aniq, kichkintoylar uchun esa muzeyda alohida interfaol zona mavjud bo‘lib, bu yerda ular yorug‘lik bilan o‘ynashlari va epchillikni mashq qilishlari mumkin.
Dubai Shopping Festival (DSF) — bu 2024-yilning 6-dekabridan 2025-yilning 12-yanvarigacha o‘tkaziladigan an’anaviy shoping bayrami. Bu yil u o‘zining 30 yillik yubileyini nishonlaydi. Butun shahar bo‘ylab joylashgan savdo markazlarida va do‘konlarda festival mehmonlarini hayratlanarli chegirmalar va aktsiyalar, qimmatbaho sovrinlar va butun oila uchun mo‘ljallangan ko‘ngilochar o‘yinlarga boy dastur kutadi.
Dubay — oilaviy dam olish uchun ideal shahar, bu yerda har bir kishi o‘ziga yoqadigan hordiq turini topishi shubhasiz. Dunyo darajasidagi manzarali parklar, tropik oranjereyalar, akvaparklar va muzeylar bu yerda o‘tkazgan har bir kuningizni kashfiyotlar va yorqin taassurotlar bilan to‘ldiradi. Ushbu mo‘jizalar shahri sizga iliq xotiralarni va unutilmas damlarni hadya qiladi.
Kompaniya sayti Visit Dubai: visitdubai.com/ru/
Reklama huquqi asosida.
Izoh (0)