Toshkent viloyatida Toshkent tumanida 15 dan ortiq jinoyat sodir etgan shaxsga sud hukmi o‘qildi. Bu haqda viloyat IIBB xabar berdi.
Jinoyat ishlari bo‘yicha Toshkent tumani sudi ochiq sud majlisida firibgarlik, pora berishda vositachilik, yolg‘on guvohlik berish, tuhmat, o‘q-dorilarni o‘g‘irlash va noqonuniy o‘tkazish kabi og‘ir va o‘ta og‘ir jinoyatlarni sodir etgan R.E. (1984-yilda tug‘ilgan)ga nisbatan sud hukmi eʼlon qilindi.
Zangiota tumani IIB huzuridagi Tergov bo‘limi tomonidan o‘tkazilgan tergov va sud hujjatlariga ko‘ra, sudlanuvchi 2021—2024-yillar oralig‘ida turli 13 ta holatda fuqarolarning ishonchiga kirib, ularga turli vaʼdalar berib, yirik miqdorda moliyaviy mablag‘larni firibgarlik yo‘li bilan qo‘lga kiritgan.
Xususan, u avtotransport vositalarini arzon narxda olib berish, yer maydonlari va ko‘chmas mulklarni sotib olish, yuqori daromadli ishga joylashtirish kabi bahonalar bilan bir necha fuqarolarning pullarini o‘zlashtirgan. Jumladan:
- 2021-yil 10-avgust kuni u bir fuqaroga arzon narxda avtomobil olib berishni vaʼda qilib, undan jami 5 800 AQSh dollari miqdorida pul mablag‘larini olgan va o‘z ehtiyojlari uchun ishlatgan.
- 2022-yil 15-oktyabrda yana bir ayol fuqaroga arzon narxda avtomobil olib berishni vaʼda qilib, oradan vaqt o‘tgach mashina emas yer uchastkasi olib berishini aytib, jami 2 100 AQSh dollari miqdoridagi pul mablag‘larini qo‘lga kiritgan.
- 2023-yil 1-oktyabrda yana bir fuqaroga yer uchastkasining kadastr hujjatlarini mansabdor tanishlari orqali rasmiylashtirib berishga ko‘ndirgan va pora berishga dalolat qilib, jabrlanuvchidan 10 000 AQSh dollari olgan, biroq vaʼdasini bajarmagan.
- 2022-yil iyun oyida boshqa bir jabrlanuvchini 2000 AQSH dollari bilan “Amirsoy” dam olish maskanidagi 10 million so‘m maoshlik ishga kirgizish va Zangiota tumanidagi bir nechta yer maydonini nomiga o‘tkazib berishga ishontirib, jami 28 700 AQSh dollari miqdorida pul mablag‘larini o‘zlashtirgan.
- 2023-yil iyul oyida yana bir fuqaroning ishonchiga kirib, 38 500 AQSh dollari miqdoridagi pullarni yer olib berish bahonasida olib, qaytarib bermagan.
- 2023-yil 5-oktyabrda yana bir jabrlanuvchiga o‘zining pasport nusxasiga tilxat yozib yer olib berishga ishontirgan va 10 000 AQSh dollari pul mablag‘larini qo‘lga kiritgan.
- 2024-yil 25-yanvarda jabrlanuvchi ayolga Bo‘stonliq tumanida dala hovlini ijaraga olib berishini va bu katta foyda keltirishini vaʼda qilib, 10 000 AQSh dollari miqdoridagi pulni qo‘lga kiritib, vaʼdasini bajarmagan.
- 2024-yil 22-fevralda yaqin tanishini 20 dona “Spark” avtomobilini elektron auksion orqali arzon narxda sotib olishga ishontirib, Telegram orqali notanish MChJning qalbaki guvohnomasi suratini yuborib, 61 750 AQSh dollarini qo‘lga kiritib, pullarni o‘z ehtiyojlariga sarflagan.
- 2024-yil mart oyida esa tanishidan qarzga 12 800 AQSh dollari olib, undan 3 500 AQSh dollarini qaytarib, qolgan qismini bermaslik uchun unga tuhmat qilgan.
- 2024-yil bahorida mahalladoshini do‘kon sotish bahonasida 65 000 AQSh dollariga chuv tushirib, pulni qaytarmaslik evaziga o‘g‘irlangan o‘q-dorilarni jabrlanuvchining hovlisiga yashirib, huquq-tartibot organlariga xabar bergan. Tezkor tadbirda ushbu o‘q-dorilarni daliliy ashyo sifatida rasmiylashtirilib, uning o‘ziga nisbatan ish qo‘zg‘atilgan.
Bundan tashqari, sudlanuvchi yer maydonlari va ko‘chmas mulklarni rasmiylashtirish uchun pora berishda vositachilik qilgan. U turli hujjatlarni soxtalashtirish, yolg‘on guvohlik berish va tuhmat qilish orqali noqonuniy daromad orttirishga harakat qilgan.
Shu kabi usullar bilan u boshqa fuqarolarni ham chuv tushirib, jami 2,8 milliard so‘mlik zarar yetkazgan.
Sud tomonidan sudlanuvchi, jabrlanuvchi va guvohlarning ko‘rsatuvlari tinglanib, jinoyat ishi hujjatlari o‘rganib chiqildi va ishda mavjud bo‘lgan dalillarga baho berildi. Jabrlanuvchi va taraflarning muzokara nutqlarini muhokama qilib, sudlanuvchiga nisbatan o‘z hukmini e’lon qildi.
Sud hukmiga ko‘ra, sudlanuvchi 1984-yilda tug‘ilgan (E.R.Y.) Jinoyat kodeksi 168-moddasi 4-qismining “a” bandi, 28, 211-moddasi 2-qismining “b” bandi, 237-moddasi 2-qismining “a, g” bandlari, 139-moddasi 3-qismining “a, g” bandlari, 238-moddasi 3-qismining “b” bandi, 247-moddasining 1-qismi, 248-moddasining 1-qismida nazarda tutilgan jinoyatlarni sodir etganlikda aybli deb topilgan. Unga nisbatan tayinlangan har xil turdagi jazolarni qisman qo‘shish yo‘li bilan uzil-kesil 8 yil 6 oy ozodlikdan mahrum qilish jazosi tayinlandi.
Shuningdek, jabrlanuvchilarga yetkazilgan moddiy zarar qoplash uchun sudlanuvchidan 2,8 milliard so‘m undirilishi belgilangan.
Bundan avval Toshkent viloyatining Ohangaron shahrida Alisher Usmonov nomi bilan firibgarlik qilgan 7 nafar yigit ushlanib, jinoyat ishi qo‘zg‘atilgandi.
Izoh (0)