Toshkent viloyatining Ohangaron shahrida Alisher Usmonov nomi bilan firibgarlik qilgan 7 nafar yigit ushlanib, jinoyat ishi qo‘zg‘atildi. Bu haqda viloyat IIBB matbuot xizmati xabar berdi.
Telegram’da “Alisher Usmonov aksiyasi” nomli guruhlar ochib, fuqarolarni “Aksiyada 20 million so‘m mukofotga ega bo‘ldingiz” kabi so‘zlar bilan aldab, pul mablag‘larini o‘zlashtirayotgan yigitlar IIBB Kiberxavfsizlik bo‘limi va Ohangaron shahar Ichki ishlar bo‘limi xodimlari tomonidan o‘tkazilgan tezkor-qidiruv tadbirlari natijasida qo‘lga olingan.
Maʼlum bo‘lishicha, Ohangaron shahrida yashovchi 25 yoshli (SH.B.) o‘z xonadonida Farg‘ona viloyatida yashovchi 18-25 yosh orasidagi 6 nafar yigitni jalb qilgan holda Telegram orqali “Alisher Usmonov aksiyasi” nomi bilan 200 dan ortiq guruh ochib, faoliyat yuritgan.
Guruhda fuqarolarga yutuq chiqqanligi haqida yolg‘on maʼlumotlar yuborilib, yutuqni olish uchun badal puli talab qilingan va turli miqdordagi pul mablag‘larini boshqa shaxslar nomidagi bank kartalariga tushirib o‘zlashtirgani aniqlangan. Tadbir davomida mazkur xonadondan 4 dona kompyuter, 11 dona telefon, Wi-Fi qurilmalari hamda turli bank kartalari daliliy ashyo sifatida olingan.
Dastlabki surishtiruvlarga ko‘ra, ushbu guruhning har bir aʼzosiga alohida vazifa belgilangan. Bir shaxs soxta chek tayyorlab, guruhlarni nazorat qilsa, boshqasi reklama tarqatish va guruhlarga odam yig‘ish bilan shug‘ullangan. Shuningdek, yana biri fuqarolar bilan muloqotga kirishish vazifasini bajargan bo‘lsa, boshqasi kunlik pul tushumlarini bankomatlar orqali naqdlashtirish bilan shug‘ullangan.
Mazkur holat yuzasidan ushlangan shaxslarga nisbatan Jinoyat kodeksining 168-moddasi 3-qismi “g” bandi bilan jinoyat ishi qo‘zg‘atildi. Dastlabki tergov harakatlari olib borilmoqda.
Izoh (0)