Turkiya sudi moliyaviy piramida tashkil qilgan ikki aka-ukani hibsga oldi. Qo‘lga olingan Mehmet Aydin va Fotih Aydin “jinoiy faoliyatdan olingan daromadlarni legallashtirish”, “jinoiy tashkilotga rahbarlik qilish” va “og‘irlashtiruvchi holatlarda firibgarlik” jinoyatlari uchun har biri 45 376 yil 6 oyga ozodlikdan mahrum etildi.
Sudda hibsga olingan jami besh nafar ayblanuvchi, jumladan aka-uka Aydinlar, jabrlanuvchilar va tomonlarning advokatlari ishtirok etdi. Prokuror aka-ukalar yuqorida sanab o‘tilgan jinoyatlarni sodir etgani uchun 4414 marta jazolanishini talab qildi.
Sud qarorida ikkala ayblanuvchiga jami 88 302 yilgacha ozodlikdan mahrum etish jazosi, boshqa ayblanuvchilarga esa turli jinoyatlar uchun turli muddatlarda ozodlikdan mahrum qilish jazosi so‘ralgan.
“Firibgarlik qilish niyatim yo‘q edi”
O‘z himoyasiga chiqqan Mehmet Aydin “bu biznesga aldash niyatida kirmaganini, hech kimni aldamagani”ni ta’kidladi.
Men kiritgan sarmoya orqali qurbonlar zararini qoplash mumkin. Ular davlat pullarni musodara qilgani sababli zarar ko‘rishdi, deydi u.
Fotih Aydin va boshqa ayblanuvchilar ayblovlarni rad etib, tashkilotga hech qanday aloqasi yo‘qligini aytishdi va oqlov hukmini talab qilishdi.
Men hech bir tashkilotga a’zo emasman. Ayblanuvchilarning ko‘pchiligi meni tanimaydi. Men yetakchi bo‘lishim uchun ular meni bilishlari kerak, men esa ularning ko‘pchiligini bilmayman, deydi Fotih.
Sud qarori
“Çiftlik Bank” nomi bilan tanilgan tizim asoschilari sifatida hibsda sudlangan Mehmet Aydin va Fotih Aydinlarning har biri 45 376 yil 6 oylik qamoq jazosiga hukm qilindi.
Ko‘plab fuqarolarni katta daromad va’da qilib aldab kelgan “Çiftlik Bank” deb nomlangan tizim asoschisi Mehmet Aydin ikki yildan ortiq vaqt davomida qochib yurganidan so‘ng Turkiya so‘roviga ko‘ra Braziliya tomonidan deportatsiya qilingan. Tergov doirasida qochoq sifatida qidirilayotgan Fotih Aydin 2021-yil iyul oyida Urugvayda qo‘lga olingan va Turkiyaga ekstraditsiya qilingan.
Bosh prokuratura tomonidan tayyorlangan 5 ta alohida ayblov xulosasida Mehmet Aydin va Fotih Aydinlarga jinoyat sodir etish maqsadida tashkilot tuzish va boshqarish, axborot tizimlaridan vosita sifatida foydalangan holda firibgarlik va tijorat kompaniyalari faoliyati doirasidagi firibgarlik bilan bog‘liq jinoyatlarda 4582 kishiga zarar yetkazgani uchun 25 699 yildan 85 646 yilgacha qamoq jazosi so‘ralgan.
Izoh (0)