Kanadaning Toronto xalqaro aeroportiga qo‘nish chog‘ida Bombardier CRJ900LR samolyoti ag‘darilib ketdi.
Hodisa 17-fevral kuni Delta Airlines aviakompaniyasining samolyoti bilan yuz bergan. U AQSHning Minneapolis shahridan uchib kelayotgan edi. Aviahalokat oqibatida 18 kishi jarohat olgan. Bombardier CRJ 900 bortida jami 76 yo‘lovchi va to‘rt nafar ekipaj a’zosi bo‘lgan. Hodisa oqibatida qurbonlar qayd etilmagan.
Odamlar ag‘darilgan samolyotdan o‘zi chiqdi
Guvohlar tomonidan aeroportdan olingan foto va videolarda samolyotdan ko‘tarilayotgan tutunni ko‘rish mumkin. Biroq, yirik yong‘in haqida xabar berilmagan. Bortda bo‘lgan odamlar ag‘darilgan samolyotdan o‘zlari chiqib ketishga muvaffaq bo‘lgan.
“Aviahalokat yuz berdi. Ammo hozircha u bilan bog‘liq holatlarni bilmaymiz. Tushunishimcha, yo‘lovchilarning aksariyati samolyotdan chiqqan va jabrlanmagan, ammo biz bunga hali ham ishonch hosil qilishga harakat qilmoqdamiz, shuning uchun voqea joyida bo‘lib, tergov olib bormoqdamiz”, deydi mahalliy politsiya vakili Sara Patten.
Torontoda so‘nggi kunlarda kuchli qor yog‘di. Mahalliy aeroport hududida atigi bir hafta ichida 53,6 santimetr qor yog‘gani qayd etildi. Bu o‘tgan uch oydagi jami yog‘ingarchilikdan ko‘p hisoblanadi. Falokat sababi hali noma’lum. Kanada transport xavfsizligi boshqarmasi tergov ishlarini boshladi.
Izoh (0)