Eron AQShni Ukraina xalqaro aviakompaniyasining Boing samolyoti halokati tergovida ishtirok etishga chaqirdi. AQSh Milliy transport xavfsizligi kengashi (NTSB) bu borada Erondan rasmiy xat olgan. RBKning xabar berishicha, bu haqda Reuters tomonidan keltirilgan NTSB bayonotida aytilgan.
Unda aytilishicha, NTSB halokat sabablarini o‘rganish bo‘yicha o‘z vakilini tayinlab bo‘lgan. “NTSB aviahalokat atrofidagi vaziyatni kuzatishni va o‘zining tergovda ishtirok etish darajasini baholashda davom ettiradi”, — deyiladi bayonotda.
Qayd etilishicha, Boeing kompaniyasi tergov ishlarida NTSB’ni qo‘llab-quvvatlashini bildirgan.
Eslatib o‘tamiz, Tehron yaqinida Boeing 737 samolyotining qulashi oqibatida 176 kishi — 82 nafar eronlik, 63 nafar kanadalik, 11 nafar ukrain, 10 nafar shved, to‘rt nafar afg‘on, uch nafar nemis va uch nafar britaniyalik halok bo‘lgan edi.Amerika OAV, jumladan, CNN manbalari samolyotning qulashiga raketa uchirishdagi xato ham sabab bo‘lishi mumkinligi haqida xabar tarqatgan. Iordaniyaning “Al-Hadath” nashri samolyot tasodifan Eron raketasi bilan urib tushirilgan bo‘lishi mumkin, deb yozgandi. Eron hukumati esa dvigateldagi alangalanish halokatga sabab bo‘lganini ma’lum qildi.
Keyinroq Kanada bosh vaziri Ukraina samolyotini Eron raketasi urib tushirganini ma’lum qilgan. Buyuk Britaniya bosh vaziri Boris Jonson ham kanadalik hamkasbining fikrini qo‘llab-quvvatlab chiqdi — uning aytishicha, Britaniyada samolyot Eron raketasi bilan urib tushirilganini tasdiqlovchi dalillar bor.
Dahshatli halokat tufayli Eron va Ukrainada 9-yanvar motam kuni deb e’lon qilindi.
Izoh (0)