Donald Tramp ma’muriyati Yadro xavfsizligi milliy boshqarmasining (NNSA) 300 dan 400 nafargacha xodimini ishdan bo‘shatdi. Ular orasida yadro quroli ishlab chiqarish obyektlarida ishlagan, pudratchilarni nazorat qilgan va qurollarni tekshirgan mutaxassislar bor, deb yozmoqda Bloomberg va CNN.
CNN ma’lumotlariga ko‘ra, ushbu qaror uchun mas’ul bo‘lgan amaldorlar NNSA AQSH yadro arsenalini nazorat qilish uchun mas’ul ekanligini bilmagan bo‘lishi mumkin. Energetika vazirligi hozir ishdan bo‘shatilganlarni qaytarishga harakat qilmoqda. Vazirlik va Bloomberg manbalarining CNN bilan raqamlari farq qiladi, amaldorlarning ta’kidlashicha, qisqartirish asosan ma’muriy funksiyalarga ega bo‘lgan “50 dan kam odamga” ta’sir qilgan.
Bunday mutaxassislar o‘ta maxfiy ma’lumotlarga kirish huquqiga ega va ularni o‘qitish 18 oygacha davom etadi, dedi NNSA sobiq rahbari Jill Xrubi.
Uning fikricha, ularning ko‘pchiligi endi davlat xizmatiga qaytmaydi.
Milliy yadro xavfsizligi boshqarmasi (NNSA) 2000-yilda AQSH Energetika vazirligi qoshidagi yarim avtonom agentlik sifatida tashkil etilgan. Uning rasmiy saytidagi ma’lumotlarga ko‘ra, boshqarmaning asosiy vazifasi “yadro fizikasini harbiy qo‘llash orqali milliy xavfsizlikni mustahkamlash”dir.
NNSA ishining asosiy yo‘nalishlari orasida AQSH yadroviy arsenalining ishonchliligi va jangovar tayyorgarligini qo‘llab-quvvatlash, ommaviy qirg‘in qurollari bilan bog‘liq global xavflarni kamaytirish, AQSH harbiy-dengiz kuchlarini atom dvigatellari bilan ta’minlash, shuningdek, mamlakat ichida va tashqarisida yadroviy va radiatsiyaviy favqulodda vaziyatlarga javob berish kabi vazifalar mavjud.
Qisqartirishlar Trampning federal idoralardagi shtatlarni keng miqyosda qisqartirish va Ilon Maskning “Davlat samaradorligi departamenti” (DOGE) bilan hamkorlik qilishni talab qiluvchi farmoni bilan bog‘liq. Ma’muriyat xarajatlarni qisqartirish uchun 10 foizgacha davlat xizmatchilarini ishdan bo‘shatishni rejalashtirmoqda, biroq bir qator shtatlar allaqachon bu qarorga qarshi da’vo arizasi kiritgan.
Ishdan bo‘shatish to‘lqini butun mamlakat bo‘ylab davom etmoqda, avvalroq Associated Press yuz minglab odamlar ishsiz qolishi mumkinligi, ayniqsa, bu 1-2 yildan kam ishlagan va sinov muddatida bo‘lganlarga tegishli ekani haqida xabar bergan edi.
Izoh (0)